50 mijë vetë në stadium për Meshën e Papës: pendesë, shpresë e shenjtëri për një hov
të ri në misionin e Kishës në SHBA.
(17.04.2008 RV)Sot Papa kremtoi
Meshën e parë të shtegtimit të tij apostolik në National Stadium (Nejshënell Steidium)
të Uashingtonit. Elteri i Meshës ishte vendosur në qendër të stadiumit më modern të
bejsbollit në SHBA, që zë 45 mijë vetë e është përuruar në fund të marsit të kaluar
nga presidenti i SHBA, Xhorxh Bush. Papa arriti në stadium në orën 10. 00 me orën
vendase, 16.00 me atë evropiane. E pritën kryeipeshkvi i Uashingtonit, imzot Donat
Uiljam Uerl, kryetari i bashkisë së kryeqytetetit, Adrian Fenti dhe autoritete të
tjera kishtare e shtetërore. Para se të arrinte në sakresti, Ati i Shenjtë ra përqark
stadiumit me papamobil e, më pas, kryesoi Meshën për besimtarët e dioqezës së Uashingtonit,
kushtuar Shpirtit Shenjt, në bashkëkremtim me imzot Uerlin dhe kardinalin Bertone.
Në homelinë e Meshës, Papa nënvizoi se të jesh i krishterë, do të thotë ta kuptosh
thellësisht se në qendër të historisë së shëlbimit është Jezu Krishti, Kryqi e ngjallja
e Tij. Kam ardhur – pohoi Ati i Shenjtë - të shpall përsëri, si Shën Pjetri në ditën
e Rrëshajve, se Jezu Krishti është Zot e Mesi, i ringjallur nga vdekja, i ulur në
të djathtën e Atit në lumni, gjykatës i të gjallëve e të vdekurve (cfr. Vap 2,
14ss). Më pas Benedikti XVI u ndalua tek ngjarjet konkrete të Kishës në SHBA,
duke i parë si pjesë përbërëse të historisë së shëlbimit e duke kujtuar posaçërisht
kremtimin e 200-vjetorit të dioqezës së Bostonit, Luisvilit, Nju Jorkut e Filadelfies
si dhe të Selisë metropolitane të Baltimores. Pasi kujtoi me nderim veprimtarinë e
breznive të shkuara për bashkimin e grupeve krejt të ndryshme të emigrantëve në
fenë katolike dhe impenjimin e tyre për përhapjen e Ungjillit, Papa theksoi se sot
Kisha e SHBA duhet të shikojë drejt së ardhmes e të jetë e gatshme për të përballuar
sfidat e reja, që nuk janë më pak kërkuese se sfidat e së kaluarës. Leximet
e sotme – shpjegoi Benedikti XVI – na ftojnë ta shikojmë rritjen e bashkësisë katolike
amerikane, si një kapitull të madh në historinë e përhapjes së Kishës pas zbritjes
së Shpirtit Shenjt ditën e Rrëshjave, duke pasur mirë parasysh se Krishti e ndërtoi
Kishën e vet mbi themelin e Apostujve (cfr Vap 21,14). Prandaj në çdo vend
e në çdo kohë, Kisha është e thirrur të rritet në unitet, të ndjekë vazhdimisht rrugën
që çon te Krishti, vepra shëlbuese e të cilit shpallet nga Pasardhësit e Apostujve
dhe kremtohet ndër sakramente. “Uroj – tha Ati i Shenjtë - që prania
e Pasardhësit të Shën Pjetrit mes jush të jetë një rast i përshtatshëm për të ripohuar
unitetin në fenë apostolike e për t’u dhënë kështu bashkëkohasve, një arsye bindëse
për të shpresuar”. Papa e vijoi homelinë me një reflektim mbi nevojën e njohjes
së shenjave premtuese të kohës, por edhe të shenjave të cilat flasin për krizën që
ka prekur themelet e shoqërisë. Është një kohë plot me premtime – tha Ati i Shenjtë
– në të cilën shikojmë se familja njerëzore bëhet gjithnjë më e bashkuar dhe më e
ndërvarur, por njëkohësisht vërejmë edhe shembjen shqetësuese të themeleve të shoqërisë:
ushtrimin në rritje të dhunës, dobësimin e vetëdijës morale, vulgarizimin e lidhjeve
shoqërore dhe largimin gjithnjë më të shpeshtë nga Zoti. “Këto dritë-hije i
shikojmë të shtrihen edhe mbi vetë Kishën, e cila – vërejti Papa - krahas
famullive të mirorganizuara, lëvizjeve plot gjallëri, entuziazmit fetar të shumë të
rinjve, percepton me dhimbje edhe praninë e përçarjeve e të polarizimit në vetë gjirin
e saj dhe zbulon me keqardhje se shumë nga të pagëzuarit, në vend që të veprojnë si
tharm në botë, sillen krejt në kundërshtim me të vërtetat e Ungjillit”. Prandaj
Ati i Shenjtë kërkoi të bëhen hapa të reja e konkrete për Ungjillëzimin e ri, duke
pasur parasysh se amerikanët kanë qenë gjithnjë popull i shpresës: “E në kontekstin
e kësaj shprese të lindur nga dashuria dhe besnikëria ndaj Zotit, unë e kuptoj më
së miri dhimbjen që provoi Kisha në Amerikë, si pasojë e shpërdorimit seksual të të
miturve. S’ gjej dot fjalë për ta shprehur dhimbjen e dëmin e shkaktuar nga një shpërdorim
i tillë”- tha Papa - dhe porositi që të tregohet kujdes i madh baritor ndaj atyre
që kanë vuajtur e të bëhen përpjekje për ta përballuar në mënyrë të ndershme e të
drejtë këtë situatë tragjike, në mënyrë që fëmijët, thesari ynë më i çmuar të cilët
Zoti i do aq shumë (cfr Mk. 10,14), të rriten në një mjedis të sigurt. Mbrojtja
e fëmijëve duhet të vijojë, ashtu si duhet të vijojnë përpjekjet për shërimin dhe
pajtimin e atyre që janë plagosur, duke i ndihmuar me të gjitha forcat – nënvizoi
Ati i Shenjtë. E pas një analize të tillë kaq delikate, Papa u bëri thirrje besimtarëve
t’i duan meshtarët e t’i mbështesin në punën e shkëlqyer që bëjnë. E, posaçërisht,
të luten që Shpirti Shenjt të ndikojë mbi Kishën dhantitë e veta: pendesën, faljen
e shenjtërinë. Përtëritja e Kishës në Amerikë varet shumë nga përtëritja e praktikimit
të sakramentit të rrëfimit e nga përpjekja për të ecur në rrugën e shenjtërisë. “Në
emër të Zotit Jezus – tha Papa në përfundim të homelisë – ju kërkoj t’i jepni
fund përçarjeve e të punoni me gëzim për t’i përgatitur rrugën Krishtit. Posaçërisht
ju nxis të jeni tharm i shpresës ungjillore në shoqërinë amerikane e të impenjoheni,
me dritën e vërtetësinë e Ungjillit, në ndërtimin e një bote gjithnjë më të drejtë
e më të lirë për breznitë e ardhshme”. Si përfundoi Mesha, Benedikti XVI u
kthye në nunciaturën apostolike, për të rifilluar, më pas, veprimtaritë në orën 17.00
me orën vendase, 23 me atë evropiane, me një nga ngjarjet më të rëndësishme të këtij
shtegtimi apostolik: takimin me botën universitare katolike në Universitetin katolik
të Uashingtonit. Ky universitet u themelua nga episkopati amerikan në vitin 1807.
Lindi si qendër për formimin pasuniversitar në arkitekturë, inxhinieri, mjekësi,
drejtësi, arte, shkenca, teatër, muzikë, drejtësi kanonike, filozofi e teologji. Përveç
këtyre, Kolegji teologjik dhe seminari universitar përgatisin për rrugën e meshtarisë
të rinj që vijnë nga të gjitha dioqezat e vendit. Motua e universitetit: “Deus Lux
Mea Est” – “Hyji është Drita ime!”. Papa Gjon Pali II e vizitoi më 7 tetor 1979, gjatë
shtegtimit të tij të parë në SHBA, Universitetin, ku zhvilloi dy takime me studentët
e me trupin pedagogjik. Në takimin e parë të Papës Racinger me botën universitare,
do të marrin pjesë 235 rektorë të Universitetit dhe të Kolegjit katolik, 195 drejtorë
dioqezanë, të ngarkuar me punën studimore, si dhe përfaqësues të pedagogëve dhe të
studentëve katolikë, rreth 600 vetë. Froni ku do të ulet Papa është projektuar nga
katër studentë, fitues të konkursit, shpallur me këtë rast. Takimi do të përfundojë
në orën 18. 15 me orën vendase, 00. 15 me atë evropiane. Benedikti XVI do të largohet
nga universiteti në drejtim të Qendrës kulturore Papa Gjon Pali II, ku do të takohet
me 220 përfaqësues të feve të tjera: hebrenj, myslimanë, indù, budistë dhe gjainistë.
Takimi do të përfundojë në orën 19.15 me orën vendase, 01.40 me orën evropiane. Nesër
– fjalimi i shumpritur në OKB, gjatë të cilit do t’u bëjë thirrje kombeve të botës
ta bazojnë çdo veprim politik mbi të drejtat e njeriut dhe mbi parimet që nuk mund
të vihen në diskutim. Diplomacia ndërkombëtare – sipas Papës – duhet t’i ketë rrënjët
në të drejtat e njeriut, vlera të padiskutueshme, themelore për të gjitha kulturat,
të shkruara në zemrën e të gjithë njerëzve.