У В'етнаме зноў пачала дзейнiчаць духоўная семiнарыя.
Дазвол на адкрыццё трэццяй духоўнай семiнарыi ў В’етнаме без абмежавання лiку семiнарыстаў,
на думку яе рэктара а. Нгонк Пхi, з’яўляецца знакам панiжэння цiску ўладаў у рэлiгiйнай
галiне. Семiнарыя ў горадзе Нха Транг будзе мець назву “Марская зорка”. “У бягучым
годзе, - сказаў яе рэктар, - у нас не было нiякiх абмежаванняў па лiку семiнарыстаў”.
Новая духоўная навучальная ўстанова, якая знаходзiцца ў больш чым за тысячу кiлометраў
на поўдзень ад сталiцы краiны, атрымала дазвол на сваё iснаванне 28 верасня 2007 года.
У ёй будуць вучыцца семiнарысты з розных дыяцэзiй В’етнаму. Згодна з iснуючымi правiламi,
спiс семiнарыстаў будзе паданы адпаведным дзяржаўным установам. Рэктар семiнарыi
падкрэслiў, што кожны год трэба павялiчваць лiк навучэнцаў, каб задаволiць патрэбы
трох дыяцэзiй, для служэння ў якiх будуць рыхтавацца будучыя маладыя святары. “Гэта,
- дадаў а.Нгонк Пхi, - можа быць успрынята як пазiтыўны знак у паводзiнах урада”.
Рэктар, якi абаранiў у свой час у Рыме дактарат у галiне кананiчнага права, зазначыў,
што кожны год колькасць навучэнцаў семiнарыi павiнна стала павялiчвацца, каб задаволiць
патрэбу ў святарах, якую адчувае Царква ў В’етнаме. Недахоп святароў адчуваецца ў
пятнаццацi розных камiсiях Бiскупскай канфярэнцыi i ў iншых царкоўных установах, што
займаюцца дабрачыннай дзейнасцю сярод бедных людзей, iмiгрантаў i iншаземцаў. Айцец
Нгонк Пхi выкладаў у згаданай семiнарыi з 1975 да 1979 года. Потым семiнарыя была
зачынена ўладамi. Цяпер у ёй займаюцца каля 200 семiнарыстаў, сярод iх i тыя, што
ў свой час не мелi магчымасцi атрымаць духоўную падрыхтоўку. Яны наведваюць двухгадовыя
тэалагiчныя курсы. Трэба адзначыць, што некаторыя в’етнамскiя святары вучацца ў Iталii,
на Фiлiпiнах, у ЗША i ў Аўстралii. Сам а. Нгонк Пхi вучыўся ў Папскiм Урбанiянскiм
унiверсiтэте ў Рыме, што дае яму магчымасць скласцi праграму тэалагiчнага навучання
ў адпаведнасцi не толькi з еўрапейскiмi, але i з сусветнымi нормамi. Нягледзячы на
гэта, кiраўнiк семiнарыi лiчыць, што ў будучынi колькасць навучэнцаў паменшыцца, бо
сучасная моладзь усё болей падпадае пад уплыў кансумiзму i не жадае рабiцца святарамi.