Papa u nis për në SHBA: shtegtimi i tetë apostolik me temë “Krishti shpresa jonë’.
(15.04.2008 RV)Sot, në orën 12.00, Papa u nis nga aeroporti romak i Fiumiçinos
drejt Uashingtonit, ku do të arrijë në orët e para të pasdites me orën vendase, ndërsa
në Romë do të ketë rënë nata. Për ta përcjellur, në aeroport kishte dalë ish-kryeministri
italian, Romano Prodi. Nuk është parashikuar për sot asnjë ceremoni zyrtare për
t’i uruar Papës mirëseardhjen, duke i krijuar, kështu, kushtet që të pushojë pas një
udhëtimi kaq të gjatë. Arritja e Benediktit XVI është përgatitur prej kohe nga
Kisha vendase, që ka organizuar takime e reflektime me temën e shpresës së krishterë.
Vëmendje e veçantë i është kushtuar të rinjve amerikanë të cilët, të ndikuar fuqimisht
nga relativizmi etik dhe materializmi i përditshëm, nuk e kanë të lehtë ta pranojnë
mesazhin ungjillor. Në qendër të kësaj vizite do të jetë takimi me kishën amerikane.
Benedikti XVI do të takohet edhe me presidentin Bush, me përfaqësuesit e konfesioneve
të tjera të krishtera e të feve të tjera. Natën e Pashkëve hebraike, do të vizitojë
sinagogën e Nju Jorkut. Ndër ngjarjet më të pritura të shtegtimit, janë fjalimi në
OKB dhe lutja në Ground Zero. Të ndjekim reflektimin e drejtorit të Sallës vatikanase
të Shtypit dhe të Radios sonë, Atë Federiko Lombardi:
“Jezu Krishti
është shpresë për burrat dhe gratë e çdo gjuhe, të çdo race, të çdo kulture e të çdo
kombi. Jo vetëm çdo njeri, por edhe çdo popull mund të gjejë tek Jezusi orientimin
dhe kuptimin e duhur, për formimin e familjes së njerëzve e të popujve, që jetojnë
si vëllezër, sipas planit të Hyjit, Atë i të gjithëve”. Ky Jezus, me urdhërimin
e dashurisë reciproke, ndriçon e përmbush “rregullën e artë”: “Duhet t’u bëni të tjerëve,
pikërisht atë që dëshironi t’jua bëjnë juve!”, rregull e shkruar në ndërgjegjen e
njeriut, pikë takimi e cila, pavarësisht nga ndryshimet, i krijon mbarë bashkësisë
njerëzore mundësitë e mirëkuptimit, duke kapërcyer ndryshimet ndërmjet feve e edhe
ndërmjet atyre që besojnë e që nuk besojnë. Në Asamblenë e përfaqësuesve
të mbarë popujve të botës, në zemër të një kombi me peshë të madhe mbi fatet e njerëzimit
të sotëm e të nesërm, Benedikti XVI dëshiron t’u ofrojë të gjithëve shërbimin e tij
si autoritet fetar e moral, duke ndriçuar, me qartësinë e tij të zakonshme, atë për
të cilën kemi më shumë nevojë: themelin, pikëmbështetjen e fortë e të përbashkët,
mbi të cilën mund të gjejmë, së bashku, përgjigje për sfidat historike që kemi përballë.
Së bashku, sepse ashtu siç pati thënë Gjon Pali II pikërisht në Kombet e Bashkuara,
kështu formojmë familjen e popujve. E në se e gjejmë së bashku themelin,
mund ta shikojmë ardhmërinë me shpresën e paqes, të drejtësisë e të lirisë. Themeli
është drejtim. Nuk është pak kjo, që Kisha dëshiron t’u ofrojë vëllazërisht, të gjithëve”.