(13.04.2008 RV)Sot Kisha katolike
kremtoi të Dielën katërt të Pashkëve. U përkujtuan edhe Shën Martini
e Shën Ermenegjildi.
Nesër, e hënë, do të përkujtohen Shenjtorët Tiburci,
Valeriani e Maksimi. Në liturgjinë e ditës do të lexohet Ungjilli sipas Gjonit. Na
kujton se Jezusi është Bariu i Mirë, që kujdeset për delet e veta aq, sa jep edhe
jetën për to, duke iu bindur plotësisht Atit të tij qiellor. Sa të çmuar jemi para
syve të Zotit, për të cilin shpirti ynë ka etje, deri sa ta shikojmë dritën e Tij.
Të
martën, shën Abondi misionar, na kujton se Ati dëshiron të na mbledhë si një grigjë
e vetme rreth një bariu të vetëm: të Birit, Bariut të Mirë. Të mos pranosh Jezusin
e veprat tij, do të thotë të ecësh pas deles së humbur. Nuk ka rrugë tjetër: do të
zgjedhësh ose Bariun ose ujkun!
E vetmja rrugë për të parë Atin, është ta njohësh
në Jezu Krishtin, të besosh në Të, që është drita e vërtetë e botës. Feja nuk është
kalim nga drita e jetës në terrin e vdekjes. Përkundrazi, është kalim nga errësira
në dritë. E ky është edhe reflektimi i së mërkurës, kur Kisha do të përkujtojë
Shën Benedikt Jozef Labrè e Shën Bernardetën Subiru, ndërsa Benedikti XVI do të kremtojë
81-vjetorin e ditëlindjes. Kujtojmë se Papa ka lindur në Marktl am Inn në Gjermani,
më 16 prill 1927.
E enjtja është dita e festës së Shën Simeonit, ipeshkëv
i Seleuçisë e martir dhe Shën Robertit, abat i Sitosë Liturgjia e festës na kujton
gjestin më të përvujtë të Jezusit: çastin kur u lanë këmbët dishepujve, duke na dhënë
një nga mësimet më të çmuara të fesë, e jo me fjalë, por me shembull. Na kujton kështu
se ç’ rrugë duhet të ndjekim.
Të premten do të përkujtohet Shën Galdini,
ipeshkëv i Milanos e kardinal, që na kujton se në shtëpinë e Atit qiellor ka shumë
vende; secili nga ne e ka një vend të lirë që na e ka përgatitur Jezusi. Në se duam
të ulemi në të një ditë, duhet të ndjekim Udhën që është vetë Krishti.
E
shtuna, dita e festës së Shën Leonit IX, është edhe dita kur Benedikti XVI, në
shtegtim, do të kremtojë në SHBA trevjetorin e papnisë (19 prill 2005). Liturgjia
na kujton se veprat e Jezusit kanë një qëllim të vetëm: ta njohim si Birin e Hyjit,
në të cilin pasqyrohet Ati.