365 ditë me njerëz e ngjarje që ia ndryshuan faqen botës.
(12.04.2008 RV)12 prill: Dekreti i Gracianit për të drejtën e strehimit Plaka
Izoldë kotet, e ulur në një bankë të kishës, ku mbretëron një heshtje e thellë…Gojët
e këqija flasin… Gojët e këqija thonë se plaka shkon në kishë, sepse s’ka ç’të bëjë
tjetër. Thonë edhe se ka gjetur vendin ideal për të kaluar pasditën ‘duke u lutur”,
në atë vend të qetë e të freskët. Por, papritmas gruaja e moçme zgurdullon sytë. Dëgjon
ulurima, zhurma, karrike që rrëzohen me poterë. Dikush vrapon me sa frymë që ka nëpër
kishë, duke shtrënguar në dorë një copë buke. E pas tij, britmat “Kapeni hajdutin!”.
Duket qartë se nuk e ka lypur, por e ka marrë vetë nga furra, pa pyetur fare…. Ndjekësit
bëhen gjashtë-shtatë vetë. Por nuk e kanë shkathtësinë e hajdutit të ri; ngatërrohen
nëpër shtylla e shkapeten njëri me tjetrin, gjë që e ngadalëson edhe më shumë ndjekjen.
“E kapën… jo… iku, po vrapon… do ta kapin? S’mund ta kapin…” - flet me vete Izolda,
ndërsa kureshtja e saj arrin kulmin. Do ta kapin, sigurisht, sepse janë më shumë.
E vërtetë, më në fund e kapin ndërmjet një qiriu e një shtatoreje së Zojës së Bekuar.
“Tani ta ndreq unë qejfin ty, kopuk kopuku, maskara i keq!” - çirret ai që u
prin ndjekësve, duke rrokur një alamet dajaku… Po shi në atë çast ia beh pa frymë
famullitari, që menjëherë hyn ndërmjet hajdutit e ndjekësve. Dom Gjoni i ka gjithnjë
gati ca shprehje jo fort të hijshme, të mësuara kur ishte ushtar. E tani i përdor
pa kursim kundër ndjekësve. Këta shqyejnë sytë, krejtësisht të çuditur. S’e kuptojnë
pse po i shan kaq rëndë. Izolda çuditet edhe më shumë. Famullitari nuk shan keqbërësin,
po ndjekësit e tij! Me sytë e zgurdulluar nga kjo e papritur, krejtësisht e pabesueshme,
prijësi i ndjekësve murmuron ca fjalë të pakuptuehsme për t’u shfajsuar, po famullitari
e ndërpret menjëherë. “I poshtër! Ku e çon besën? Të drejtën e strehimit?”. Cilën
të drejtë strehimi? Të gjithë hapin sytë. Çudi pas çudie. Duke i parë kështu, meshtari
qetësohet paksa e nis t’u shpjegojë se kishat janë vende të shenjta, strehë të padhunueshme,
në të cilat nuk mund të ndiqet askush. Kush shkel në Kishë, është në ndore të Krishtit.
E kështu ka qenë gjithnjë. Pak kohë më parë, një murg me emrin Gracian, i ka mbledhur
të gjitha shkrimet e Kishës, që flasin për këtë argument e ka krijuar atë që tashmë
njihet si ‘Dekreti i Gracianit’, i cili vërteton paprekshmërinë e vendeve të kultit.
Sapo një njeri, fajtor a i pafajshëm, kapërcen pragun e një Kishe, është në besë
të Kishës e askush nuk ka të drejtë t’ia prekë as edhe një fije floku, derisa të dalë
që aty. E meshtarët kujdesen të dalë vetëm pasi shpirtërat të jenë qetësuar sadopak.
Nuk e bëjnë këtë për të mbrojtur kriminelët, por për të shmangur rrezikun e hakmarrjeve
ose të dënimeve të nxituara e të padrejta. Ndjekësit e kuptojnë e largohen, ndërsa
plaka Izoldë rikthehet ‘për të vijuar lutjen’ në bankën e vet, ku nis rishtas të kotet,
në kishën ku mbretëron heshtja….