Në prag të shtegtimit të Papës në SHBA: flet kardinali Staford, i Universitetit Papnor
të Shën Kryqit.
(11.04.2008 RV)Të martën e ardhshme
fillon shtegtimi apostolik i Papës në SHBA, që do të përfundojë të dielën, më 20 prill,
në Nju Jork. Pikërisht për këtë shtegtim foli, gjatë një takimi organizuar sot në
Romë nga Shoqata e Shërbimit Informativ në fushën e veprimtarive kishtare (ISCOM),
kardinali amerikan, Xhejms Frensis Staford, Kryependestar i gjykatës së Pendestarisë
Apostolike. Kisha, që Benedikti XVI do të gjejë në SHBA, në dhjetvjeçarin e fundit
ka ndryshuar shumë nga ajo që pati gjetur Gjon Pali II. Elementi më i ri – shpjegon
kardinali Staford, është pluralizmi kulturor, që përcaktohet kryesisht nga shtimi
i numrit të besimtarëve të ardhur nga Jugu: “Benedikti XVI gjen një Kishë më
pluraliste në këndvështrimin kulturor, në krahasim me atë që pati gjetur Gjon Pali
II. Në jug të SHBA është rritur numri i vietnamezëve dhe i hispanikëve. Gjë e pashembullt
në këtë vend protestant”. Siç theksoi kardinali Tarçizio Bertone, sekretar
i Shtetit të Vatikanit, në fjalimin drejtuar meshtarëve, Papa do të flasë edhe për
shkandullin e shpërdorimeve seksuale, që i hapi plagë të rënda Kishës katolike amerikane
e cila sot – pohon kardinali Staford, po kalon një periudhë të thellë reformimi:
“Mendoj se drejtuesit kishtarë pas kësaj krize, e edhe gjatë saj, kanë fituar energji
të reja për ta reformuar Kishën”. Pastaj, gjatë vizitës në Pallatin e Qelqit
- shpjegon Kryependestari Apostolik - Papa do të shprehë edhe shqetësimet për situatën
në Irak:: “Ati i Shenjtë, duke mbajtur fjalim në Kombet e Bashkuara, dëshiron
të vërë mirë në dukje rolin e Kishës katolike në botë. Papa dëshiron t’i nxisë njerëzit
të reflektojnë për faktin se në Irak po vritet popullsia e pafajshme. E një shqetësim
i madh është edhe dhuna kundër Kishës kaldeje. Gjithë kjo vë në rrezik vetë ardhmërinë
e Kishës në Irak”. Së fundi Hirësia e Tij kujtoi, ndërmjet ngjarjeve më të
pritura, përveç vizitës në Ground Zero, edhe pjesëmarrjen e Benediktit XVI në kremtimet
me rastin e 200- vjetorit të dioqezës së Bostonit, Luisvilit, Nju Jorkut e Filadelfies
si dhe të Selisë metropolitane të Baltimores.