Në Bazilikën e Vatikanit -Meshë për shpirtin e imzot Rahhos, tridhjetë ditë pas vrasjes.
(11.04.2008 RV)Sot paradite, në Bazilikën e Shën Pjetrit në Vatikan, kardinali
Leonardo Sandri kremtoi Meshën Shenjte për shpirtin e imzot Paulos Faraj Rahho, kryeipeshkëv
kalde i Mosulit, tridhjetë ditë pasi trupi i tij u gjet pa jetë. Ishte data 13 mars
2008. Uniteti i Eukaristisë – tha kardinali Sandri, prefekt i Kongregatës për
Kishat Lindore, që kryesoi liturgjinë – na bën pjesëmarrës në jetën e pamort të Krishtit
të Ngjallur. Prandaj sot na duket si t’i kishim pranë, si të ishin mes nesh, kryeipeshkvin
kalde të Mosulit dhe tre të rinjtë katolikë të vrarë në ditën kur rrëmbehej e mbytej
ipeshkvi. Kardinali kujtoi, gjatë kremtimit, edhe 3 subdiakonët e vrarë gjatë këtij
viti në Irak, së bashku me priftin Raged Gani dhe viktimën e fundit të konfliktit
gjakatar në këtë vend, atë Jozef Adel.Eukaristia – nënvizoi kardinali Sandri, i kishte
edukuar dhe i kishte përgatitur Meshtarët e vrarë për flijimin e jetës, ashtu si
Krishti, në gjurmët e të cilit ecën deri në vdekje. Ata kishin përsëritur çdo ditë
fjalët e Krishtit: “Ky është korpi im, ku është gjaku im. Bëjeni këtë në kujtim
tim. Sa herë imzot Rahho e meshtarët tjerë të vrarë, i përsëritën këto fjalë në liturgji,
duke u përgatitur për t’ia dhuruar vetveten Hyjit e vëllezërve e duke u bërë kështu,
bukë e pastërt për Krishtin”.