Kina deklaron se ka zbuluar një komplot kundër atletëve olimpikë
(10.04.2008 RV)Flaka Olimpike është në udhëtim për në Buenos Ajres, kryeqytet
i Argjentinës, ku flakëmbajtësi i parë do të jetë futbollisti i mirënjohur Diego Armando
Maradona. Presidenti i Komitetit Olimpik ndërkombëtar deklaroi se rruga e stafetës
nuk do të shkurtohet, por pranoi edhe se protestat përgjatë saj mund t’i çojnë drejt
krizës Lojrat Olimpike. Kësaj frike i shtohet sot edhe lajmi se myslimanët kinezë,
apo ujgurët, kanë pasur ndërmend të rrëmbejnë atletë, gazetarë e funksionarë sportivë,
gjatë Lojrave të gushtit në Kinë. Komploti është zbuluar nga policia kineze. Ndërkaq,
liderët botërorë vazhdojnë të prononcohen për pjesëmarrjen e tyre në Lojrat Olimpike.
Presidenti amerikan Xhorxh Bush ka njoftuar se do të marrë pjesë në ceremoninë e hapjes,
ndërsa kryeministri britanik Gordon Braun, jo. Mbështet Lojrat Olimpike Dalai Lama,
lideri shpirtëror i tibetianëve, rreth të cilit Kina vazhdon të shtrëngojë darën e
akuzave. Nga ana tjetër, Parlamenti Evropian ka miratuar sot një rezolutë, me të cilën
i kërkon Bashkimit Evropian të vlerësojë mundësinë e bojkotimit të ceremonisë së hapjes
së Lojrave Olimpike në Pekin.