У панядзелак 7-га красавіка, пад вечар, Папа наведаў базыліку Сьвятога Барталамея,
якая знаходзіцца на востраве Тыбэр. У часе візыту Сьвяцейшы Айцец прыпрмніў, што
Ян Павал ІІ пасьвяціў гэтае месца памяці мучанікаў 20-га стагоддзя і даручыў яго рымскай
Супольнасьці Сьвятога Эджыдыя, якая ў 2008-м годзе ўшаноўвае 40-а годдзе свайго заснаваньня. У
казаньні, ў часе Літургіі Слова, Бэнэдыкт 16 прыпомніў, што ў Базыліцы Сьвятога Барталамея
ўшаноўваецца памяць шматлікіх мучанікаў. Ужо ад сярэднявечча там знаходзяцца мошчы
Апостала Барталамея ды Сьвятога Вайцеха. Шэсьць алтароў увекавечвае памяць хрысьціян
розных веравызнаньняў, якія ў 20-м стагоддзі сталі ахвярамі камунізму і нацызму, былі
замардаваныя ў Амэрыцы, Азіі, Акеаніі, Гішпаніі, Мэксыка,Афрыцы. Даючы сьведчаньне
веры, яны жылі любоў”ю Хрыста. Многія панесьлі сьмерць, выконваючы эвангэлізацыйную
місію Касьцёла- прыпомніў далей Сьвяцейшы Айцец. Іхняя кроў зьмяшалася з крывёю мясцовых
хрысьціян, якім перадавалі веру. Іншыя, часта будучы ў меншасьці, былі забітыя з
нянавісьці да веры. Іншыя ўканцы аддалі жыцьцё, каб не пакінуць патрабуючых, убогіх,
даручаных ім вернікаў. Не пабаяліся пагрозаў і небясьпекаў- сказаў на заканчэньне
сваёй прамовы Бэнэдыкт 16. Гэта былі біскупы, сьвятары, законніцы і законнікі ды
вернікі -сьвецкія асобы.