(07.04.2008 RV)‘Zecchino d’oro’ radhitet ndërmjet pasurive të UNESCO-s për
kulturën e paqes. Është fjala për festivalin ndërkombëtar të fëmijëve, që organizohet
çdo vit nga françeskanët e Bolonjës, i cili sapo ka mbushr 50- vjet veprimtarie. Është
i pari program televiziv, që konsiderohet ‘Pasuri e UNESCO-s’. Ideja për organizmin
e festivalit është e aktorit të njohur italian, Çino Tortorela, që drejtoi vite me
radhë shfaqjet e festivalit, i mbështetur nga Antoniano e Bolonjës e, personalisht,
nga Atë Ernesto Karoli, emër i njohur në Shqipëri posaçërisht për ndihmat e pakursyera
në ndërtimin e Kishës së Shën Andout në Laç. Në festivalin ndërkombëtar të fëmijëve
Shqipëria u përfaqësua vetëm një herë, në vitin 1992, me ndërmjetësimin e Atë Zef
Pllumit. Përfaqësuesi, Alfons Baba, që shkonte në Bolonjë nga Shkodra, fitoi admirimin
e të gjithëve dhe zuri vendin e dytë me këngën “Gjinkalla”, me fjalët e krijuara sipas
fabulës së njohur të la Fontenit “Gjinkalla e milingona”, kompozuar nga Agron Xhunga. E
– theksojmë ‘Zecchino d’oro’ kërkon këngëtarë të vegjël për Festivalin e 51-të ndërkombëtar.
Fëmijët duhet të kenë moshën 4 deri në 10 vjeçare. Sivjet janë të ftuar Kanadaja,
Kina, Ekuadori, Gjermania, Libani, Greqia, Nigeria, Portugalia, Rumania e Sllovenia.
Por, në se ka ndonjë këngëtar të vogël shqiptar, që meriton të konkurojë në këtë festival
– kujtojmë se përzgjedhjet do të bëhen nga fundi i prillit deri në gjysmën e majit.