Aktivitetet kryesore të Benediktit XVI gjatë javës
(30.03.2008 RV)Të hënën pas Pashkëve, gjatë Lutjes së Mbretëreshës Qiellore,
Benedikti XVI kujtoi martirët e Kishës në vitin e kaluar dhe uroi që dëshmia e tyre
të jetë burim shprese për botën. Fjalët e Papës vunë theksin mbi Ditën e lutjes e
të ngjinesës për misionarët e vrarë, kremtuar pikërisht të hënën, 24 mars. Këto fjalë
i paraprinë edhe vizitës që Ati i Shenjtë do të bëjë më 7 prill në ishullin Tiberin
në Romë, me rastin e 40-vjetorit të Bashkësisë së Shën Egjidit. Pikërisht në këtë
ishull, ndodhet shenjtorja përkujtimore e martirëve të kohës sonë, e cila do të vizitohet
nga Papa. Në të ndodhen relike të çmueshme të shenjtërve, që janë persekutuar gjatë
shekullit XX.
Bindja e gëzimi i Ngjalljes së Krishtit, “ngjarje e mahnitshme”,
“çelësi i kthesës së Krishterimit”. Ngjallja e Jezu Krishtit ia ka ndryshuar rrjedhën
historisë, por ende sot ka disa njerëz që e vënë në dyshim këtë. Në sajë të dokumentave
e të përvojës së bashkësisë së parë të krishterë, nuk mund të mohohet e vërteta historike
e Ngjalljes së Krishtit. Kështu pohoi Papa Benedikti XVI të mërkurën e kaluar gjatë
audiencës së përgjithshme në Vatikan duke folur para afër 30 mijë besimtarësh e shtegtarësh,
mbi kremtimin e Pashkëve. “Në Kishë gjithçka kuptohet duke u nisur nga ky mister
i madh i Ngjalljes së Krishtit”, tha Papa e shtoi “Pashkët e Jezusit janë edhe Pashkët
tona, sepse në Krishtin e ngjallur na është dhuruar siguria e ringjalljes sonë përfundimtare”.
Më 2 prill bie 3-vjetori i vdekjes së Shërbëtorit të Zotit Gjon Pali
II. Në atë ditë, në orën 10.30, Papa Benedikti XVI do të kremtojë një meshë të përshpirtshme
në kujtim të tij, ne tremen e Bazilikës së Shën Pjetrit. Në prill të vitit 2007 është
deklaruar e mbyllur faza dioqezane e procesit të lumnimit të Papës Vojtila, duke i
dorëzuar dokumentat dikasterit përkatës vatikanas, Kongregatës për Çështjet e Shenjtërve.
Ati
i Shenjtë po përgatitet për udhëtimin apostolik që do të bëjë në SHBA-të, nga 15 deri
më 21 prillin e ardhshëm. Pikërisht për këtë, po të mërkurën, ai priti në audiencë
presidentin e Asamblesë së përgjithshme të OKB-së, maqedonasin Srgjan Kerim. Ndër
temat e bisedës, edhe vizita në selinë e Kombëve të Bashkuara në Nju Jork. Në udhëtimin
e tij, Benedikti XVI do të takojë edhe presidentin amerikan Xhorxh Bush.
Të
martën e kaluar, u paraqit në Moskë versioni në rusisht i Enciklikës së Papës Benedikti
XVI “Spe Salvi”. Një hap i rëndësishëm përpara në rrugën ekumenike. Pritet ndërkaq,
që të fiksohet data e takimit ndërmjet Patrikut ortodoks të Rusisë, Aleksej II dhe
kryeipeshkvit të Nënës së Zotit në Moskë, imzot Paolo Peci.
Gjesti i Papës,
që pagëzoi gazetarin italian me origjinë egjiptiane, Magdi Allam në Shën Pjetër, në
Meshën e Natës së Pashkëve, ka një rëndësi të madhe, pasi pohon në mënyrë të përvujtë,
por të qartë, lirinë fetare të çdo individi. Kështu shkruan gazeta e Vatikanit “L’Osservatore
Romano” për sakramentin e marrë nga zv.drejtori i gazetës “Corriere della Sera”, i
cili nga tradicionalisht mysliman u kthye në katolik. Në një notë të atë Federiko
Lombardit, drejtor i Sallës së Shtypit të Selisë së Shenjtë, sqarohet edhe se mendimet
e shprehura për Islamin nga Magdi Kristian Allam nuk janë të gjitha të njëjta me ato
të Vatikanit.