Magdi Allam dhe raste të tjera kthimi në krishterim në Kosovë
(26.03.2008 RV)Pagëzimi i gazetarit
italian me origjinë egjiptiane, Magdi Allam, zv.drejtor i gazetës më të njohur të
vendit, “Corriere della Sera” shkaktoi polemika në botën myslimane. Ai u pagëzua në
fenë e krishterë nga Papa Benedikti XVI në Meshën Solemne të Natës së Pashkëve dhe
të nesërmen, me një editorial në gazetën ku punon, shpjegoi se pagëzimi ishte përfundimi
i natyrshëm i një rruge personale, që e kishte bërë të zgjidhte krishterimin, në vend
të Islamit, duke marrë emrin Kristian. Magdi Kristian Allam pohon se familja e tij
ka qenë myslimane, por ai vetë ka kryer shkolla të krishtera, edhe në Egjipt, para
se të vinte në Itali dhe vazhdon duke nënvizuar se në këtë moment nuk ekziston një
Islam i moderuar. Është pikërisht ky pohim dhe fakti që u pagëzua nga Papa, elementët
që acaruan esponentë myslimanë kudo në botë. Në një faqe interneti të Hamasit madje,
sulmohet Selia e Shenjtë, e cila akuzohet se me këtë pagëzim publik fyhen ndjenjat
e myslimanëve. Në artikullin e vet, gazeta e Vatikanit “Osservatore Romano” sqaron
se pagëzimi është kërkuar lirisht nga vetë Magdi Allam dhe atij nuk i është dhënë
asnjë rëndësi mediatike nga Selia e Shenjtë, deri në minutin kur zv.drejtori i “Corriere
della Sera” u pa në televizion. Gjithsesi, shkruan drejtori i Osservatore-s, Xhan
Maria Vian, duke cituar drejtorin e Sallës së Shtypit të Vatikanit, atë Federiko Lombardin,
nuk ekziston nga ana e Selisë së Shenjtë asnjë qëllim armiqësor ndaj një feje të madhe
si ajo islamike. Papa, me gjestin e kthimit në krishterim të një myslimani, “afirmon,
në mënyrë të përvujtë e të qartë, lirinë fetare”. Asnjë referim nuk i bën gazeta vatikanase
deklaratës së Magdi Allam, se nuk ekziston Islami i moderuar. Me pagëzimin –
tha për Pashkë, Papa Benedikti XVI – drita e Zotit hyn brenda nesh duke shndërruar
vetë errësirën, dhe Pashkët na thonë se Krishti është “shpresa e vërtetë për çdo njeri”.
Duke e thirrur secilin prej nesh të kthehet nga Zoti, ato na ftojnë “të jetojmë duke
e refuzuar urrejtjen dhe egoizmin”. Sepse me të vërtetë, “zemra e Zotit dhe zemra
e njeriut u takuan” në dashurinë e Krishtit. Pagëzime si ai i Magdi Allam janë
bërë edhe në Kosovë në Meshën e Pashkëve. Të dëgjojmë informacionin e Rabije Ibrajt
nga Prishtina…