(25.03.2008 RV)Qendra don Orione e Romës kremtoi 100 vjet aktivitet misionar
dhe bamirës, me një meshë në Kishën e të gjithë shenjtërve. Kujtojmë se kjo kishë
ka qenë edhe kisha romake e caktuar për kardinalin e parë shqiptar, Mikel Koliqin
e se për shumë vjet ka shërbyer si pikë takimi e përshpirtërie për emigrantët shqiptarë
të Romës. Orioninët veprojnë prej vitesh në Shqipëri e në veçanti, në Elbasan. Historia
e kësaj kishe nis një shekull më parë, kur në mes të barakave romake jashtë Mureve
Aureliane, fillonte misionin e vet një meshtar i ri i dërguar në mes të të varfërve
nga Papa Piu X. Ai meshtar, don Luigji Orione, do të bëhej shpejt një pikë referimi
për mbarë Kishën, shenjt themelues i Urdhërit të Orioninëve.