У Ватыкане з"явіцца помнік Галілею. Ініцыятыва ўсталявання помніка навукоўцу супала
з пачаткам вялікага праекта, прысвечанага 400-годдзю вынайдзенага Галілеем тэлескопа
(з выпуклым аб’ектывам і ўвагнутым акулярам).
Ватыкан ушануе памяць вялікага матэматыка, фізіка і астранома Галілео Галілея (1564–1642).
Сёлета ў адным з ватыканскіх садоў яму будзе ўсталяваны помнік непадалёк ад таго месца,
дзе 22 дні ў 1633 г. утрымліваўся астраном, чакаючы працэсу па абвінавачанні ў ерасі
(гэта была кватэра пасла Фларэнцыі ў Ватыкане). «Ватыкан такім чынам хоча паставіць
апошнюю кропку ў гэтай гісторыі», — паведаміў старшыня Папскай Акадэміі Навук Нікола
Кабібо. Ён патлумачыў, што Касцёл жадае паказаць прамую сувязь між навукай і верай.
Святкаванне гэтай падзеі, якая фармальна прыпадае на 2009 г., пачнецца ўжо сёлета
ў чатырох італьянскіх гарадах — Рыме, Пізе, Фларэнцыі і Падуі. Так, у фларэнтыйскім
музeі гісторыі навукі, у якім захоўваюцца аўтэнтычныя тэлескопы Галілея, 4 сакавіка
2008 г. адкрылася выстава «Прылада, якая змяніла свет». Адным са шматлікіх юбілейных
мерапрыемстваў з нагоды вынаходніцтва Галілеем тэлескопа будзе адкрыццё помніка навукоўцу
ў садах Ватыкана.