Situata të tjera të rrezikshme në Shqipëri, përveç Gërdecit
(19.03.2008 RV)Prokuroria e Shqipërisë ka kërkuar ndihmën e SHBA-ve për hetimet
që kanë të bëjnë me tragjedinë e Gërdecit dhe për identifikimin e trupave pa jetë,
të karbonizuara. Prokuroja Ina Rama ka njoftuar gjithashtu se ish-Ministri i Mbrotjes,
Fatmir Mediu do të merret në pyetje. Ndërkaq, televizionet shqiptare paraqesin sot
pamje nga Gjiri i Vlorës, tabani i të cilit është mbuluar me predha që nga Lufta II
Botërore, me të cilat askush nuk është marrë deri tani e që mund të shpërthejnë nga
çasti në çast. Kujtojmë se kryeministri i Shqipërisë, Sali Berisha pati deklaruar
vetëm dy ditë më parë se bregdeti shqiptar është bonifikuar prej tyre. Opozita e majtë
ka vendosur të organizojë për të premten një protestë kundër qeverisë së Tiranës,
akuzuar si e vetmja përgjegjëse e shpërthimit të së shtunës në Gërdec.