Serbia kërkon hetime nga OKB-ja për Mitrovicën. Kondolica Rajs u bën thirrje palëve
të mos përdorin dhunën.
(18.03.2008 RV)Qyteti i Mitrovicës, në veri të Kosovës, është sot i qetë, por
gjendja mbetet e tensionuar. Policia e UNMIK-ut akoma nuk është kthyer në zonën, që
mbetet nën kontrollin ushtarak të KFOR-it. Një nga policët ukrainas të UNMIK-ut ka
humbur jetën nga plagët e marra në ndeshjet e djeshme me serbët. Ndërkaq, janë plagosur
rreth 60 policë të UNMIK-ut dhe 20 ushtarë francezë të KFOR-it, përveç 150 manifestuesve.
Mbrëmë, në një intervistë televizive, presidenti serb Boris Tadiç mbështeti braktisjen
e institucioneve nga serbët e Kosovës.
Serbia ka kërkuar gjithashtu që
OKB-ja të zhvillojë hetime për mënyrën e sjelljes së policisë së UNMIK-ut dhe
forcave të KFOR-it në Mitrovicë. Në një notë zyrtare drejtuar Sekretarit të Përgjithshëm
të OKB-së, Ban Ki Mun, ministri i jashtëm serb Vuk Jeremiç e konsideron reagimin e
tyre si ekstremist e përdorimin e forcës të papranueshëm. Ndërkaq, nga Rusia
ku është takuar me autoritetet, sekretarja amerikane e shtetit, Kondolica Rajs u kërkon
si shqiptarëve, ashtu edhe serbëve të mos përdorin dhunën dhe të mos bëjnë provokime.
Për ministrin e jashtëm rus, Lavrov, gjendja e krijuar në Mitrovicë është pasojë e
qartë e shpalljes së pavarësisë së Kosovës, që për Moskën mbetet e gabuar.