Atë Federiko Lombardi reflekton për ‘Udhën e Kryqit” të imzot Rahhos
(16.03.2008 RV)Bashkësia
e krishterë irakiane i dha dje lamtumirën e fundit imzot Paulos Faraj Rahho, kryeipeshkëv
i Mosulit të Kaldejve, që u gjet i vdekur të enjten e kaluar, pasi qe rrëmbyer më
29 shkurt. Gjatë Meshës së dritës, kremtuar pak kilometra larg Mosulit, Patriku i
Babilonisë së Kaldejve, kardinali Emanueli III Deli, kujtoi dëshminë e guximshme të
prelatit, duke ripohuar me forcë se Kisha nuk merr kurrë hak. Mesha u tha në të njëjtën
Kishë, ku u kremtuan edhe salikimet e shoferit dhe të dy rojeve të ipeshkvit, vrarë
gjatë sulmit për rrëmbinim e prelatit. Nesër Papa Benedikti XVI do të kryesojë, në
Kapelën e “Nënës së Shëlbuesit” në Vatikan, Meshën Shenjte për shpirtin e imzot Rahhos.
Mbi këtë ngjarje dramatike, të ndjekim reflektimin e drejtorit tonë, Atë Federiko
Lombardit:
“Imzot Rahho, kryeipeshkëv i Mosulit të Kaldejve në Irak,
u rrëmbye më 29 shkurt nga një grup terroristësh, duke dalë nga Kisha, ku sapo kishte
përfunduar kremtimin e Udhës së Kryqit të së premtes me besimtarët e tij. Kjo Udhë
Kryqi u bë udha e tij e Kryqit, udha e Kryqit e jetës së tij, e Kishës së tij, e popullit
të tij, udhë që përfundoi me vdekjen e ipeshkvit. Shtangemi para një mizorie kaq çnjerëzore,
kaq të pakuptueshme, kaq misterioze. Mysterium iniquitatis. Misteri i mbrapshtisë,
i së keqes e i pushtetit të saj. Këtij misteri i përgjigjet gjaku i martirëve, njerëz
të paqes, të dashurisë, që i kapërcen kufijtë e urrejtjes e të vdekjes. Na
kujtohen imzot Romero, i vrarë ndërsa kremtonte Eukaristinë në San Salvador; kardinali
Posadas Okampo në Gudalahara të Meksikës; ipeshkvijtë kolumbianë Duarte Kançino e
Haramiljo, vrarë nga guerrilasit; nunci, imzot Kurtnei, i mbytur në Burundi… e së
bashku me ipeshkvijtë, sa meshtarë, sa besimtarë të pafajshëm vrarë në Amerikë, në
Afrikë, në Azi. Ku vdes populli, me të vdes edhe Kisha, sepse është pjesë e gjallë
e tij. Nuk mund të mos jetë kështu! E bashkësia e vogël e krishterë në
Irak, e paktë në numër, duket se ka tepër nevojë për solidaritetin tonë e për lutjen
tonë. Bashkësi tepër e lashtë, që mbijetoi mes dallgësh të furishme, duket se rrezikohet
vërtetë të shuhet në situatën e sotme dramatike. Në telegramin e ngushëllimit,
Papa lutet që “Kjo ngjarje tragjike të shërbejë për t’i rikthyer paqen trojeve të
martirizuara të Irakut”; e të gjithë urojmë që kjo dhunë ta shkundë e ta rizgjojë
ndërgjegjen e atyre që mund të kontribuojnë më shumë për sigurimin e paqes. Feja
na mëson se, pasi kryejmë Udhën e Kryqit, presim ringjalljen!