Dhimbje e mallëngjim në funeralin e kryeipeshkvit të Mosulit në Irak
(14.03.2008 RV)Mijëra njerëz, ndër
të cilët ipeshkvij, besimtarë të krishterë e myslimanë morën pjesë sot në funeralin
e kryeipeshkvit kalde të Mosulit, imzot Rahho, trupi pa jetë i të cilit u gjet dje.
Kujtojmë se ipeshkvi u rrëmbye nga një komando e armatosur më 29 shkurt. Në fshatin
Karamles, ku janë varrosur edhe tre personat e tjerë që u vranë në momentin e kapjes
së ipeshkvit, kortezhi i përmortshëm u kryesua nga ipeshkvi ndihmës i Bagdadit, imzot
Shlemon Varduni e nga kryeipeshkvi siro-katolik i Mosulit, imzot Georges Kasmusa.
Meshën e përshpirtshme e kremtoi Patriku i Babilonisë së kaldejve, kardinali Emanuel
III Deli. Për atmosferën që shoqëroi funeralin të dëgjojmë motër Ivën nga murgeshat
e Urdhërit “Bijat e Zojës së Papërlyer”: Kishte shumë njerëz: të krishterë,
myslimanë, patriku, nunci, shumë meshtarë. Ne të krishterët nuk e humbim fenë, përkundrazi,
ajo na jep forcë. Sepse ne bëjmë pjesë në histori, në fillesat e këtij vendi. Nuk
kemi frikë, kemi fenë, kemi guximin. Pavarësisht nga ç’ndodhi, njerëzit luten. Gjatë
kalimit të kortezhit të përmortshëm, heshtja e pikëlluar e njerëzve u prish vetëm
nga këngët funebre. Në anët e rrugës, shumë gra me lule në duar, ia dhanë vajit kur
kalonte arkivoli i mbuluar me degë ulliri, që mbahej nga besimtarët. Imzot Rahho e
donte Irakun. Këtë kujtojnë njerëzit. Këtë kujton edhe administratori patriarkal i
Erbilit, imzot Rabban al Kas, në mikrofonin tonë: Ipeshkvi nuk ishte vetëm
ipeshkvi i të krishterëve, është bir i qytetit të Mosulit. Portat e ipeshkvisë ishin
të hapur për këdo, jo vetëm për të krishterët, por edhe për arabët. Terrorizmi nuk
do të jetë fundi i miqësisë sonë. Jemi të bashkuar në mbrojtjen e të krishterëve nga
terroristët. Të krishterët në Irak janë gati 1 milion, prej të cilëve 600
mijë kaldej. Gjithsesi, në këtë moment, është e vështirë të jepen shifra, për shkak
se njerëzit janë zhvendosur në Siri e Jordani, ose edhe përbrenda Irakut, për t’u
larguar nga lufta. Mosuli konfirmohet si qyteti më i rrezikshëm për të krishterët.
Vetëm në vitin 2007 janë vrarë aty së paku 13 të krishterë e janë rrëmbyer dy meshtarë
e një ipeshkëv. Për të gjithë Irakun, bilanci i viktimave në aksione të dhunshme për
vitin e kaluar, është 47 të vrarë të krishterë.