Benedikti XVI në audiencën e përgjithshme dënon burgosjen dhe torturimin e njerëzve
për shkak të ideve e kërkon thellimin në temat kulturore dhe etike.
(12.03.2008 RV)“Thirrje në mbrojtje
të të gjithë atyre që burgosen padrejtësisht e, jo rrallë, edhe torturohen për shkak
të ideve të tyre politike e fetare - dhe vetëdije se, në një kohë jo të lehtë për
integrimin e kulturave, mundësia që ato të jetojnë në harmoni, mund të realizohet
vetëm me ndihmën e Zotit”. Këto ishin dy temat kryesore të katekizmit të Benedikti
XVI në audiencën e përgjithshme, mbajtur në Sallën e Palit VI në Vatikan. Duke i
kushtuar vëmendje të veçantë edhe shkollës e qëllimeve të mësimit, Papa i ftoi pedagogët
e të gjitha shkollave t’i thellojnë mesazhet kulturore dhe etike, pa u kufizuar thjeshtë
në transmetimin e nocioneve. Përfundoi, pastaj, me një përshëndetje krejt të veçantë
në gjuhën latine, drejtuar një instituti suedez, që ua mëson këtë gjuhë një numri
të madh nxënësish. Boecio e Kasiodori: dy njerëz mendjemprehtë, në kapërcyell
të historisë, në sa kultura greko-romake perëndon e, jo pa dhimbje, zevendësohet me
vlerat e popujve të rinj, Ostrogotëve e Gotëve. Benedikti XVI foli për këto dy figura
që, ashtu si shumë shpirtëra të tjerë fisnikë, u përpoqën të përdorin kategoritë e
filozofisë greke, për të propozuar fenë e krishterë dhe kërkuan mundësinë e pajtimit
e të harmonisë ndërmjet trashëgimisë helenistiko-romake dhe mesazhit ungjillor. Njëkohësisht
u përpoqën edhe të shkrinin, në një kulturë të re, tiparet më të rëndësishme të shoqërisë
romake me vlerat e popujve të rinj veriorë të shekullit V. Boecio e pagoi këtë impenjim
intelektual me shumë vjet burgimi e, pastaj, edhe me jetë. Prandaj Papa e paraqiti
si simbol të luftës kundër padrejtësive, që vërehen shpesh edhe sot, në përpjekjen
për të ushtruar drejtësinë njerëzore. “Çdo i burgosur, pavarësisht nga shkaku
i mbylljes në qeli, e ndjen sa i rëndë është ky dënim njerëzor, posaçërisht kur shoqërohet
edhe me tortura, siç i ndodhi Boecios. Edhe më absurd është përdorimi i torturës,
deri në vdekje, pa kurrfarë arsyeje tjetër, përveç ndryshimit të bindjeve politike
e fetare, si në rastin e Boecios, të cilin Pavia e njeh dhe e kremton në liturgji,
si martir të fesë. Simbol i një numri të pafund njerëzish të burgosur padrejtësisht
në të gjitha kohërat e në të gjitha vendet, Boecio është porta objektive e hyrjes
në kundrimin e misterit të të Kryqëzuarit të Golgotës”. Edhe nga qelia e tij –
vijoi Ati i Shenjtë – i cili në përfundim përshëndeti një grup të burgosurish nga
burgu i Lançianos – Boecio nuk pushoi kurrë s’e kërkuari Zotin, ‘të mirën e pambaruar
drejt së cilës, me ose pa vetëdije, priret çdo qenie njerëzore’. Drama e burgimit
mizor, nuk e bëri kurrë të përkulej, aq më pak, të thyhej. Përkundrazi, e nxiti ta
refuzonte pranimin fatalistik të vuajtjes, sepse një pranim i tillë – pohonte Boecio
– mohon shpresën për ta takuar Hyjin në lutje”. “Në burg (Boecio) kërkon ngushëllim,
kërkon dritë, kërkon urti. E na tregon se diti t’i dallojë, edhe në këto kushte, të
mirat në dukje, që në burg zhduken fare – nga të mirat e vërteta, që nuk zhduken as
në burg. Miqësia, për shembull. E sidomos të mirën e pambaruar, që është Zoti”. Bashkëkohës
me Boecion, edhe Kasiodori – shpjegoi Benedikti XVI – u përpoq të mos binte në harresë
gjithë pasuria njerëzore e humanistike, e grumbulluar në shekujt e artë të Perandorisë
romake. E që kjo të mos ndodhte, pati një intuitë, vendimtare për fatet kulturore,
kryesisht të Evropës: “Konceptoi idenë t’ua besonte pikërisht murgjërve detyrën
për ta shpëtuar, për ta ruajtur e për t’ua transmetuar pasardhësve, pasurinë e pafundme
kulturore, të trashëguar nga lashtësia, që kështu të mos humbiste. Për ta realizuar
këtë, themeloi Vivarium, një kuvend në të cilin gjithçka ishte organizuar në mënyrë
të tillë, që puna intelektuale e murgjërëve të shikohej si veprimtari tepër e nderuar,
e çmuar dhe e pazëvendësueshme. E kjo, pa i prekur fare detyrat shpirtërore monastike
e të krishtera si dhe veprimtaritë bamirëse në ndihmë të më të varfërve”. Ashtu
si të mërkurën e kaluar, Papa u ndalua për pak çaste në Bazilikën e Shën Pjetrit,
për të përshëndetur turmën e besimtarëve, para se të shkonte në Sallën e Palit VI.
Ishte një turmë e përbërë kryesisht nga studentë, me të cilët Benedikti XVI reflektoi
për mësimin, në një kohë kur shkolla ndodhet para sfidave të shumta që krijohen në
fushën e edukimit të breznive të reja: “Për këtë arsye, shkolla nuk mund të jetë
vetëm vend i marrjes së nocioneve, por është e thirrur t’u krijojë nxënësve mundësitë
t’i thellojnë mesazhet e vlefshme me karakter kulturor, etik e fetar. Kush jep mësim,
nuk mund të mos i perceptojë dhe aspektet morale të çdo diturie njerëzore, sepse
njeriu mëson për të vepruar e veprimi është fryt i mësimit”. Në përfundim të audiencës
së përgjithshme, urimi i Benediktit XVI në gjuhën latine, drejtuar studentëve të institutit
suedez të Skorës, “Schola Cathedralis Scarensis”, në të cilën jepet mësim në gjuhën
latine, që është edhe lënda kryesore: “Volumus omnio eorum confirmare et incitare…”.
“Dëshirojmë t’i nxisim të thellohen në studim, ndërsa këtu në Romë, vizitojnë
gjurmët e qytetërimit të krishterë e të romakëve të lashtë: uroj që kjo përvojë ta
përsosë pasurinë e tyre njerëzore e shpirtërore”.