Imzot Dodë Gjergji: kurrë më vrasje, të respektohet jeta e çdo njeriu!
Jeta e njeriut është dhuratë e çmueshme e Zotit e këndej vlera më e shtrenjtë dhe
më e shenjtë që lypet ruajtur, mbrojtur, kultivuar, dashur e dhuruar të tjerëve për
dashuri e me dashuri. Kështu pohon mes tjerash ipeshkvi i Kosovës imzot Dodë Gjergjin
në letrën e tij baritore drejtuar besimtarëve katolikët të Vendit në të cilën dënon
vrasjen e hakmarrjen dhe bën thirrje për pajtim vëllazëror. Po më hollësisht nga
Prishtina të ndjekim shërbimin e Rabie Ibrajt
Ja tani
teksti i plote i letres baritore te ipeshkvit te Kosoves.
LETËR BARITORE E
IMZOT DODË GJERGJIT FAMULLIVE KISHTARE TË KOSOVËS “Zoti është pronari i vetëm
i jetës së njeriut, vetëm Ai ka të drejtë t’ia japë apo t’ia marrë atë dikujt”
Vëllezër
e motra, besimtarë të dashur! Me dhembje të madhe në shpirt dhe me pikëllim të
thellë në zemër përcjellim disa ngjarje tragjike, vrasje në mesin e besimtarëve tanë,
që rrënojnë dhuratën më të çmueshme të Zotit, jetën e njeriut, dhe veshin në zi shumë
familje tona. Shkrimi i Shenjtë na mëson shumë qartë se: “Hyji e krijoi njeriun
në përngjasimin e vet...” (Zan 1, 27). Kjo e vërtetë biblike na tërheq vëmendjen tonë
prej besimtari se njeriu ka dinjitet të shenjtë dhe nga kjo shenjtëri buron respektimi
i jetës ndaj çdo personi pa dallim. Hyji deshi që njeriu të jetojë në pajtim të vazhdueshëm
me Krijuesin e vet dhe me njeriun vëlla-motër. Fatkeqësisht, kjo gjendje e parë
e përngjasimit të Zotit në shenjtëri dhe vëllazëri nuk zgjati shumë, sepse Djalli
e mashtroi njeriun dhe njerëzit e parë bënë mëkatin burimor apo të rrjedhshëm, dhe
ai u prish me Zotin, me njëri-tjetrin aq shumë sa që erdhi edhe te gjakderdhja dhe
vëllavrasja e parë, kur Kaini e ngriti dorën kundër Abelit duke e vrarë atë. Hyji
e thirri në përgjegjësi Kainin duke i thënë kështu: “Po çka bëre? Zëri i gjakut të
vëllait tënd bërtet tek unë prej dheut...” (Zan 4, 10). Ky zë i gjakut, mjerisht,
s’është ndalur të bërtasë nëpër shekuj, duke u lartësuar deri në Fronet e Tejetlartit
Hyj. Sa gjaku i pafajshëm është derdhur me shekuj në trojet tona dhe pret drejtësi
dhe thërret në përgjegjësi! Vlerën e jetës së njeriut Zoti e mbron dhe e sanksionon
edhe me Urdhrin e pestë, i cili qartas dhe vendosmërisht përcakton: “Mos vra!” (Dal
20, 13). Sepse vrasja është shëmtimi më i madh ndaj vlerës së jetës së njeriut. Prandaj,
përmes urdhrit të sanksionimit të vrasjes, Hyji ka dashur ta mbrojë njeriun prej njeriut,
e njëkohësisht ta edukojë për të qenë respektues i të tjerëve. Shëlbuesi ynë Jezu
Krishti është bërë për ne Njeri, Flijim në kryq për të na pajtuar me Atin dhe me njëri-tjetrin.
Ai me urdhrin e dashurisë e ka ngritur dashurinë ndaj të afërmit në shkallën e dashurisë
ndaj Hyjit, duke dashur që në shoqërinë tonë të mbizotërojë dashuria e ndërsjellë,
të ndalohet cenimi dhe dhuna ndaj tjetrit, sepse çdonjëri është përngjasim i Fytyrës
së Tij. Në këtë kuptim, Papa Gjon Pali II në emër të mësimit të Kishës Katolike
dhe të traditës së krishterë thoshte:“Dhuna nuk është e denjë për njeriun... Dhuna
shkatërron atë që mendon se po mbron: dinjitetin, jetën, lirinë e qenieve njerëzore.”,
dhe vazhdon: “Vetëm dashuria mund ta ndërrojë plotësisht njeriun” (Gjon Pali II, Discorso
presso Droghda, Irlandë, 29 shtator 1979, në: AAS 71). Vrasjet e rënda në mesin
e njerëzve tanë, që kohët e fundit kanë ndodhur në vendin tonë konsiderohen si shëmtim
dhe rrënim i dashurisë vëllazërore dhe të krishterë. Aq më tepër, këto ngjarje janë
të dhimbshme tani pas shpalljes së pavarësisë së Republikës së Kosovës, kurorëzim
ky i nevojave, dëshirave dhe aspiratave tona shekullore, që së fundi na mundëson edhe
neve, që të jemi pjesë e Evropës së qytetëruar. Tash kur të gjithë qytetarët e
shtetit të Kosovës kanë mundësi të barabarta para ligjit për të jetuar dhe punuar
lirisht, për t’i shprehur aftësitë e tyre njerëzore, familjare dhe profesionale, gjithnjë
në të mirë dhe në dobi të vetvetes dhe të shoqërisë sonë, dukuritë e përçarjeve dhe
vrasjeve ia ndalin hovin e rritjes dhe të përparimit vendit tonë. Kuptojmë ngarkesat
dhe ngatërresat e shumëfishta shekullore, sidomos ato para, gjatë dhe pas Luftës së
viti 1999, si dhe vështirësitë e ndryshme për qytetarët tanë. Mirëpo askush kurrë
s’ka të drejtë t’ia marrë vetvetes apo tjetrit jetën! Çdo mosmarrëveshje, hidhërim
apo fyerje mes njëri-tjetrit duhet të zgjidhet me bisedim, dialog dhe komunikim, nëpërmjet
ligjeve dhe institucioneve tona. A thua pak na kanë vrarë dhe shkatërruar të tjerët
me shekuj, e tani edhe ne duam ta asgjësojmë vetveten? Çdo rast i tillë është së
pari vetëvrasje, pastaj vëllavrasje dhe së fundi vrasja e tjetrit, mëkat ky tejet
i rëndë, krim i pafalshëm, që nuk duhet të përsëritet më kurrë pas Pajtimeve të Gjaqeve
në Pranverën tonë të madhe të vitit 1990! Ftojmë të gjithë besimtarët tanë nëpër
famullitë e Kosovës dhe më gjerë, që vendosmërisht t’i kundërvihen kësaj dukurie shëmtuese
duke mbrojtur, nderuar dhe kultivuar jetën njerëzore në çdo fazë, prej zanafillës
e deri në kalimin në amshim, sepse jeta është pronë e Zotit dhe i takon vetëm atij.
Vetëm kështu do ta nderojmë Zotin, Krijuesin dhe Dhuruesin e jetës, dhe njëri-tjetrin
në vëllazëri dhe dashuri, duke plotësuar kështu misionin tonë njerëzor, kombëtar dhe
fetar. Ndërsa i kujtojmë në uratë shpirtin e këtyre viktimave, familjet e tyre,
në këtë kohë të shenjtë të Kreshmëve, të lutemi, të bëjmë pendesë dhe të jepemi pas
bamirësisë, si përgatitje shpirtërore për festën e Pashkëve, Ngjalljen e Jezu Krishtit,
burimit të Paqes, që të jetë ringjallja jonë. Të punojmë të gjithë së bashku, që
me ndihmën e Zotit dhe me pjesëmarrjen tonë të mbizotërojë sa më parë paqja dhe pajtimi,
falja dhe dashuria, se vetëm kështu ne do të jemi bijtë dhe bijat e Zotit, drita dhe
kripa e botës, dëshmitarët e jetës, të ngjalljes dhe fitores së Jezu Krishtit mbi
të keqen, mëkatin dhe vdekjen!
Në Prizren, më 7 mars 2008. + Dodë Gjergji,
ipeshkëv