(06.03.08 RV)“Shuplaka e varfërisë dhe e përdorimit të dhunës, vlera e impenjimit
misionar dhe bashkëpunimi i çmuar me meshtarët, ishin temat më të rëndësishme, që
preku Benedikti XVI gjatë takimit të sotëm me ipeshkvijtë e Guatemalës, në vizitë
‘ad Limina’ (Tek varret e Apostujve). Papa ripohoi me forcë edhe mbrojtjen e martesës
e të familjes, si qelizë themelore e shoqërisë. Temat e prekura nga Ati i Shenjtë
përkojnë plotësisht me situatën në një vend, ku 60% e popullisë është e varfër, ku
ushtrohet dhuna e ku emigracioni peshon rëndë mbi zhvillimin e vendit, duke e varfëruar
më tej e duke ndikuar negativisht mbi jetën e individëve e të familjeve. Është një
situatë - pohoi Ati i Shenjtë duke iu drejtuar ipeshkvijve – që kërkon nga ju përpjekje
të reja, për t’i treguar të gjithëve fytyrën përdëllyese të Zotit. Një sfidë tjetër
për prelatët guatemalezë, që u theksua nga Benedikti XVI, është ajo e përhapjes së
sekteve, në një vend që shquhet për ndjenja të thella fetare: “Dios ha bedecido
al pueblo guatemalteco…” Zoti e ka bekuar popullin guatemalez duke i dhuruar
një ndjenjë të thellë fetare, të pasur me shprehje popullore, të cilat besimtarët
i kanë krijuar në gjirin e bashkësive të krishtera, duke e kremtuar me gëzim fenë
e tyre, si gjymtyrë të gjalla të Korpit të Krishtit”. Ati i Shenjtë theksoi
se pikërisht kjo fe e fortë dhe pjesëmarrja në sakramente, i përforcojnë besimtarët
për t’i bërë ballë rrezikut të sekteve e të grupeve të vetquajtura karizmatike, që
e çorientojnë dhe e rrezikojnë bashkësinë kishtare. Në përfundim Ati i Shenjtë
i nxiti ipeshkvijtë të jenë prijës të zellshëm të popullit të Zotit, që u është besuar,
në mënyrë që: “Que, con vuestra calabra y eiemplo…” “…me fjalën e
me shembullin tuaj, Kisha të vijojë të ndriçojë, si burim shprese për të gjithë”.