Rëndohet kriza ndërmjet Kolumbisë, Venezuelës dhe Ekuadorit
(04.03.2008 RV)Vazhdon kriza ndërmjet Kolumbisë dhe Venezuelës. Karakasi ka
përjashtuar nga vendi personelin diplomatik kolumbian. Gjithashtu, që mbrëmë, Ekuadori
ka prishur marrëdhëniet diplomatike me Bogotanë. Si Ekuadori, ashtu edhe Venezuela
i kanë marrë këto vendime pas aksionit të forcave të armatosura kolumbiane FARC në
territorin ekuadorian. Gjatë luftimeve u vra Raul Rives, numri dy i FARC-ut. Ndërkaq,
në Kolumbi, autoritetet flasin për dokumenta që provojnë kontakte ndërmjet krerëve
të FARC-ut dhe ministrave të Ekuadorit e Venezuelës. Në një dokument madje thuhet
se presidenti venezuelian, Çavez u ka dhuruar militantëve të FARC-ut 300 milion dollarë. Bashkësia
ndërkombëtare ndërhyn, nëpërmjet fuqisë rajonale, Brazilit, që i ka kërkuar presidentit
kolumbian t’i kërkojë falje kolegut të tij Rafael Korrea, për ndërhyrjen në territorin
ekuadorian. Qeveria ekuadoriane dhe ajo venezueliane kanë zhvendosur trupa ushtarake
drejt kufirit me Kolumbinë.
E quajtur “super e marta”, dita e sotme është
shumë e rëndësishme për të kuptuar se cili do të jetë kandidati demokrat në zgjedhjet
presidenciale amerikane, Barak Obama apo Hilari Klinton. Sytë e të gjithëve
janë drejtuar nga Teksasi, Ohajo, Vermonti dhe Roud Ajlënd. Gruaja e ish-presidentit
Klinton nuk është tërhequr, pavarësisht nga sondazhet që favorizojnë Obamën. Ndërsa
për demokratët loja nuk ka përfunduar ende, për republikanët është tashmë e qartë
se sido që të shkojnë votimet e sotme, kandidati për president është Xhon MekKein.