Ipeshkvijtë e Guatemalës tek Benedikti XVI në vizitë “ad Limina”: varfëria dhe mbrojtja e jetës, sfidat e mëdha të Kishës në vendin qendroamerikan.

(03.03.2008 RV) Filloi sot paradite vizita ‘ad Limina Apostolorum’ e ipeshkvijve të Guatemalës, vend latinoamerikan, që ka vuajtur shumë gjatë përpjekjes për të ecur në rrugën e demokracisë. Ish–koloni spanjolle, e pavarur që nga viti 1939, iu desh t’u nënshtrohej disa regjimeve ushtarake diktatoriale. Më pas u trondit nga dy luftëra civile e vijoi të trazohej nga ushtarakët, deri në marrëveshjen e paqes të 1996-tës. Dy vjet më vonë u vra imzot Huan Hosè Gjerardi, ipeshkëv ndihmës e Vikar i Qytetit të Guatemalës, mbrojtës guximtar i të drejtave të njeriut.
Sot ky komb, të cilin Papa Gjon Pali II e vizitoi tri herë, bën përpjekje për të hyrë në rrugën e zhvillimit të vërtetë demokratik e për të ecur përpara në rrugën e përparimit ekonomik, ndonëse i duhet të kapërcejë pengesa jo të pakta.
I pyetur për sfidat e sotme të Kishës në Guatemalë, kardinali Rodolfo Kuezada Toruno, kryeipeshkëv i kryeqytetit, u përgjigj kështu në mikrofonin e Radios sonë:

“Më duket se janë katër. E para është varfëria e njerëzve tanë, e vëllezërve tanë. 60% e popullsisë guatemalase është e varfër. Sfida e dytë është ajo e veprimtarisë kundër sekteve neopentekostale. E treta, më duket se është inkulturimi i Ungjillit në kulturën vendase: kujtoj se kemi 22 etni të ndryshme në kombin tonë. E, së fundi, përpjekjet më të mëdha të Kishës në mbrojtje të jetës”.