365 ditë me njerëz e ngjarje që ia ndryshuan faqen botës.
(03.03.2008 RV) 3 mars:
Një shtet për papën e një kurorë për Pipinon e Shkurtër. Mbreti i frankëve,
Pipinua i Shkurtër, darkon në shoqëri me Papën Shtjefni II. “Sa gëzohem që u shëruat-
i thotë Pipinua Papës. U shqetësuam shumë kur u sëmurët, në sa po arrinit këtu nga
Roma. Keni qenë në rrezik vdekjeje gjatë gjithë dimrit. Jam shumë i kënaqur që sonte
po hani me kaq oreks. S’ju kam parë që kur kështu”. “Ju falënderoj që u kujdesët
kaq shumë për mua, Zotëri. Por sa për oreksin ja… erdha në Francë t’ju flas për një
njeri që ka oreks katallani. E nuk i intereson një copë mish i pjekur, si ky që po
ha unë, por të gjitha pronat e Kishës, të gjitha tokat që ka papa në Itali” “E
keni fjalën për Astolfin, mbretin e Longobardëve - apo jo!”. “Pikërisht – përgjigjet
Papa - na ka ngrënë deri tani shumë toka, por ç’e do, s’është ngopur akoma. S’ka gjë
që ia shuan urinë! Por ne nuk kemi mjete për t’u mbrojtur. Prandaj erdha të kërkoj
ndihmën tuaj! Ushtria e frankëve është shumë e fuqishme; vetëm ju mund t’i shpartalloni
longobardët!”. “Nuk ka asnjë dyshim! – pohon Pipinua duke vrenjtur vetullat. Ushtria
ime do t’i hajë gjallë”. “Zotëri, na ndihmoni. Kisha ka nevojë për toka. Ne shpresojmë
se do të vijë dita, kur Papa do të ketë autoritet, pa pasur nevojë të qeverisë një
shtet, ashtu si bëjnë mbretërit e tjerë. Por kjo ditë nuk ka ardhur akoma. …. Mbretërit
e Evropës e quajnë veten të krishterë, ndonëse nuk rrijnë as një minut të qetë. Nuk
pushojnë së shkaktuari turbullira: i vetmi mjet që ka Kisha për t’u imponuar autoritetin
e saj, është të jetë po aq e fortë, sa mbretëritë më të fuqishme”. “Sigurisht,
Atë i Shenjtë, por….”. “Por, çfarë?”. Pipinua është gati ta ndihmojë Shtjefnin
II, sepse e do Kishën. Por, në se mund të fitojë diçka, si shkëmbim për ndihmën,
edhe më mirë! Prijësi dinak i frankëve ka një ide. Që kur u kurorëzua mbret në vitin
751, shumëkush i është kundërvënë autoritetit të tij. Pëshpëritet se ipeshkvijtë,
që e kurorëzuan, nuk ishin prelatë të vërtetë. Në se Papa me dorën e vet e kurorëzon
përsëri, rebelëve do t’u mbyllet goja një herë e përgjithmonë. Pipinua ia kërkon
këtë Papës, e shton: “Kjo do të më japë më shumë autoritet mbi ushtrinë time, për
ta mundur Astolfin”.Kështu Pipinua i Shkurtër, babai i Karlit të Madh, në vitin 754
kurorëzohet nga vetë Papa. Pastaj, për të mbajtur premtimin, sulet kundër longobardëve
dhe e liron Kishën nga kërcënimi i tyre. Madje pushton edhe toka të reja , që i shtohen
trojeve të vjetra të Kishës. Deri në fund të shekullit XIX Papa ishte sundimtari i
një pjese të madhe të Italisë, që njihej me emrin Shteti papnor. Falë Pipinos, Kisha
u mbrojt nga oreksi prej katallani i mbretërve si Astolfi.