Më 4 e 5 mars - takime dypalëshe me përfaqësues të Islamit, për të përgatitur vizitën
tek Papa.
(28.02.2008 RV)Më 4 e më 5 mars
do të organizohen në Romë takime paraprake dypalëshe, për të përcaktuar vizitën e
një delegacioni islamik tek Papa, ndoshta këtë pranverë. Takimet do të mbahen në selinë
e Këshillit Papnor për Dialogun Ndërfetar. Me që është takimi i parë i kësaj natyre,
nuk duhen pritur shumë të reja prej tij, mbasi bëhet fjalë kryesisht për të përcaktuar
ecurinë e mëtejshme të dialogut dhe qëndrimet e ndryshme, rreth të cilave do të zhvillohet
ballafaqimi i ardhshëm. Delegacioni islamik përbëhet nga Abdel Hakim Murad Vinter,
i Trustit Akademik Universitar Mysliman të Anglisë; Aref Ali Naied, ish-profesor i
Institutit Papnor të studimeve arabe dhe islamistikës; Serxho Jahja Palaviçini, i
Bashkësisë Islamike italiane (Coreis); Ibrahim Kalin, i Seta Foundejshën të Ankarasë
dhe jordanezi Sohail Nakhuda, drejtor i Revistës Islamike. Delegacioni vatikanas
do të kryesohet nga kardinali Zhan Lui Toran, kryetar i Këshillit Papnor për Dialogun
Ndërfetar. Do të marrin pjesë në bisedime edhe sekretari i dikasterit vatikanas, imzot
Pierluigi Çelata si dhe drejtori i Institutit Papnor të studimeve arabe dhe islamistikës,
(PISAI), Miguel Aiuzo. Mundësitë për realizimin e kësaj ngjarjeje të madhe, që
kardinali Toran, kryetar i Këshillit Papnor për Dialogun Ndërfetar e quan historike,
i krijoi shkëmbimi i Letrave, në nëntorin e dhjetorin e kaluar, ndërmjet Selisë së
Shenjtë dhe princit të Jordanisë, Ghazi bin Muhammad bin Talal, në krye të grupit
të 138 dijetarëve myslimanë nga 43 kombe të ndryshme. Më 13 tetor 2007, me rastin
e përfundimit të Ramazanit, një grup i përbërë prej 138 personalitetesh të shquara
myslimane i shkroi Atit të Shenjtë dhe prijësve të Kishave e konfesioneve të tjera
të krishtera Letrën e hapur, që titullohej “Një fjalë e përbashkët ndërmjet Nesh e
Jush” dhe kërkuan të fillojnë ballafaqimin. Pikat e zgjedhura si bazë për dialogun
ndërfetar ishin besimi në një Zot të vetëm dhe urdhërimi i dyfishtë për të dashur
Hyjin e të afërmin. Më 19 nëntor - përgjigja e Papës, nënshkruar nga Sekretari
i Shtetit të Vatikanit, Kardinali Tarçizio Bertone. I drejtohej Princit Ghazi , anëtar
i familjes mbretërore të Jordanisë dhe kryetar i Institutit të Mendimit Islamik ‘Aal
al- Bejt”, një nga organizatorët e nismës, i cili u kujdes personalisht për dërgimin
e Letrës. Duke falënderuar e duke i shprehur vlerësimin e tij për nismën domethënëse
grupit të shquar të personaliteteve myslimane Papa, pa i injoruar ndryshimet ndërmjet
dy feve, ripohon rëndësinë e dialogut të bazuar mbi respektin e njëmendtë të dinjitetit
të njeriut, mbi njohjen objektive të fesë së tjetrit, mbi shkëmbimin e përvojës fetare
dhe mbi impenjimin e përbashkët për të promovuar respektin dhe pranimin e anasjelltë.
Së fundi, ftesa për një takim në Vatikan, përmes një delegacioni të 138 dijetarëve. Duke
marrë zemër nga vizita e kohëve të fundit që bëri në Vatikan mbreti saudit Abd Allah
bin Abd Al-Aziz, jemi të gatshëm të takohemi me Benediktin XVI në Romë – iu përgjigj
princi jordanez, kardinalit Bertone, pas këshillimit me nënshkruesit kryesorë të Letrës
së 138 dijetarëve myslimanë, drejtuar Papës dhe liderëve të tjerë të krishterë. Dialog
- pohohet në Letër - do të thotë shkëmbim mendimesh ndërmjet personave me këndvështrime
të ndryshme. Arsyeja që na shtyn të dialogojmë – vijon Letra - është dëshira për të
praktikuar atë që ne, myslimanët, e quajmë ‘rahmah’ e ju keni kënaqësinë ta quani
‘caritas’. Princi jordanez pohon se nuk mund të ketë marrëveshje teologjike të plotë
ndërmjet të krishterëve e myslimanëve. Megjithatë shpreh vullnetin e mirë për bashkëpunim
të bazuar mbi gjithçka që përkon ndërmjet dy palëve, për interes të së mirës së përbashkët
e për dobinë e mbarë botës dhe paralajmëron se është gati të dërgojë tre përfaqësues
për të biseduar lidhur me hollësirat e takimit.