365 ditë me njerëz e ngjarje që ia ndryshuan faqen botës.
(25.02.2008 RV)25 shkurt: Kënga
gregoriane, muzikë kishtare që u bën ballë shekujve Si mund t’i këndohet mirë
e më mirë dashurisë hyjnore? E të kremtohen mirë e më mirë mrekullitë e natyrës e
drita e fesë? E t’i këndohet kujdesit e dashurisë që ka Hyji për secilin nga ne? Si
mund t’i lutemi Atij që na ndjek me durim atëror, Atij që, prej Adamit - te Jezusi,
i shoqëron njerëzit me dashurinë e tij të pafund? Kisha e shekujve të parë nuk
bën kaq shumë pyetje: shfrytëzon muzikën e kohës. Shumë nga meloditë e saj frymëzohen
nga ato të sinagogave. Më pas, në çdo komb, të krishterët e kremtojnë, e brohorasin
e e lavdërojnë Hyjin me muzikat e tyre tipike. Kjo larmi është sigurisht edhe pasuri,
por si mund të orientohesh në këtë pyll të kapërthyer tingujsh? Këngët që këndojnë
besimtarët e Milanos, nuk janë të njëjta me ato që këndojnë besimtarët e Romës; iberikët
e Spanjës nuk i këndojnë këngët, që jehojnë në kishat e gjermanikëve ose të galëve.
E ka keq e më keq: në Gali disa priftërinj këndojnë latinisht, ndërsa besimtarët u
përgjigjen në greqisht, duke e ngatërruar fare melodinë e duke krijuar kështu zhurma,
jo harmoninë që duhet të krijojë muzika. Përveç këtyre, krishterimi kërcënohet
nga herezi të shumta e interpretime të gabuara… Kisha ka nevojë për këngë, që e transmetojnë
besnikërisht fjalën e Zotit. Papa Gregori i madh e njeh mirë muzikën. Madje edhe
kompozon. Dëshiron që Kisha të këndojë njëzëri e që murgjërit e krishterë ta lavdërojnë
njëlloj Hyjin. Gjatë vizitës së tij në Bizant, ndjek kremtimet në Kishën e Shën
Sofisë e i pëlqejnë pa masë. Një t’u kthyer nga shtegtimi, nis rishikimin e të gjitha
melodive liturgjike, për të krijuar një përmblehdje këngësh, të cilat të krishterët
do t’i përdorin me rastin e festimeve të ndryshme. Kërkon melodi të thjeshta, të thella,
që shprehin njëkohësisht lartimin e shpirtit dhe konkretësinë e tij. Ndërmjet përkthimeve
të ndryshme që ka grumbulluar, Gregorit i pëlqen në mënyrë të veçantë repertori i
Kishës së Milanos, këngët që këndoheshin në Kohën e Ambrozit, kur kthehej në fenë
e Krishtit Shën Agostini. I frymëzuar nga tingujt e tyre, Papa Gregori i madh kompozon
një përmbledhje këngësh, që u quajtën gregoriane e që do t’i shërbenin mbarë Kishës.Në
rrjedhë shekujsh kënga gregoriane do të zhvillohet, murgjërit do ta pasurojnë. Kur
hyjmë në një manastir ose kur i dëgjojmë këto këngë, na krijohet përshtypja se muzika
vjen nga larg, nga kufijtë e universit e të kohës…. E kështu edhe është. Të krishterë
të tjerë i ruajtën me kujdes, pa i ndryshuar fare, këngët e para të Kishës: mund t’i
dëgjojmë të kënduara me devocion e frymëzim në bashkësitë e krishtera të Lindjes,
në Turqi, Irak, Egjipt e Siri, ku, shumë nga këngët e lashta, tani janë regjistruar
me mjete moderne elektronike. Kështu, në se dëshironi t’i dëgjoni, nuk jeni të detyruar
të shtegtoni drejt Lindjes…. Mjafton të shtypni një buton e kënga gregoriane, në krahët
e tingujve, do t’ju çojë atje ku nisi, atje ku u rikrijua, atje ku ruhet e këndohet
për lavdi të Hyjit.