“Populli, shenjtëria, Kisha”: reflektim i Atë Federiko Lombardit mbi Udhëzuesin “Sanctorum
Mater” të Kongregatës për Çështjet e Shenjtorëve.
(24.02.2008 RV) Të hënën e kaluar,
kardinali Zhoze Saraiva Martins, prefekt i Kongregatës për Çështjet e Shenjtorëve,
paraqiti, në Sallën e Shtypit të Vatikanit, Udhëzuesin ‘Sanctorum Mater” (Nëna
e Shenjtorëve), një dokument, i cili u krijon ipeshkvijve dioqezanë dhe bashkëpunëtorëve
të tyre, kushtet për ta zhvilluar fazën e parë të një procesi lumnimi – dmth fazën
që zhvillohet në vend – me atë përpikmëri që kërkon vërtetimi i famës së shenjtërisë
të kandidatit për t’u lartuar në nderimet e elterit. Për këtë dokument, të dëgjojmë
reflektimin e drejtorit tonë, Atë Federiko Lombardit:
"Procesi
që çon drejt njohjes publike të shenjtërisë së një njeriu, nuk mund as të fillojë,
në se nuk e kërkon vetë bashkësia e krishterë. Kjo është një nga pikat më domethënëse
të Udhëzimit të ri të Kongregatës për Çështjet e Shenjtorëve. Pohohet se për fillimin
e procesit, është absolutisht i nevojshëm vërtetimi serioz dhe i thelluar i përhapjes
së famës së shenjtërisë ose të martirizmit, në një masë të madhe besimtarësh. Kjo
do të thotë se të lumtë ose shenjtorët nuk mund të shpallen të tillë ‘me porosi’’,
ose sepse kështu i pëlqen një njeriu me influencë, por vetëm në se populli besimtar
është i bindur që ka përpara vetes një dëshmitar të jashtëzakonshëm të fesë, një shembull,
të cilit i drejtohet vetvetiu si ndërmjtësues, duke iu lutur ta ndihmojë për të arritur
te Hyji. Kisha, pra, beson se Shpirti i Zotit është i pranishëm, i flet popullit të
Hyjit, i jep një ndjeshmëri të posaçme. E bën të aftë për të njohur praninë e shenjtërisë
së vërtetë, të hirit të saj e të vlerës së saj për jetën e krishterë. Kjo
është aq e rëndësishme, sa Kisha universale duhet të ketë në Romë një dikaster e disa
ligje të mirëpërcaktuara, për të dialoguar me këtë ndjesi të pranisë së shenjtërisë
e për të shqyrtuar mirë në se Hyji dëshiron ta përforcojë këtë ndjesi të besimtarëve
për praninë e shenjtërisë me shenja të qarta – siç janë mrekullitë, në mënyrë që të
arrihet me siguri të plotë tek shpallja e mundshme publike e shenjtërisë së një anëtari
të Kishës. E i lumi ose shenjti i kanonizuar është vetëm ‘maja e ajzbergut’ e realitetit
të mrekullueshëm të jetës, që jetohet me dashuri të patundur të krishterë. Shenjtëria
është thelbësore për Kishën. Doktrina është themelore, ashtu siç është edhe rregulli
në jetën e bashkësisë, por shenjtëria është realizimi i plotë i jetës së krishterë,
që jetohet në lidhje të ngushtë me Hyjin, drejt së cilës synon gjithçka, është lumnia
e vërtetë e Hyjit. E është edhe prova më e sigurtë e besueshmërisë së Kishës. Benedikti
XVI na kujton se: “Hyji nuk vjen të na takojë i vetëm, vjen i shoqëruar, vjen së
bashku me Marinë e me Shenjtorët. E ne lutemi që Kisha të jetë gjithnjë vërtetë “Nënë
shenjtorësh”.