365 ditë me njerëz e ngjarje që ia ndryshuan faqen botës.
(23.02.2008 RV)23 shkurt: Agostini i Kantërbërit; kthimi i Anglisë në fenë
e krishterë. Këmbana e Kishës së Shën Martinit në Kantërbëri përhap në ajër
tingujt e saj muzikorë. Është ftesa për Meshën e mëngjesit. I ulur në korin e kishës
së vogël, Agostini shikon bashkësinë e besimtarëve. Murgu vë buzën në gaz. Kënaqet
duke parë bankat që mbushen me shpejtësi e nuk mjaftojnë për të gjithë besimtarët,
që i përgjigjen zërit të këmbanës. I tërheq vëmendjen një njeri në mes të bashkësisë.
E ka vënë re prej disa javësh, por nuk e di kush mund të jetë. Ndoshta është ndonjë
prej paganëve të zonës, që e ka prekë hiri i Hyjit e tani nuk mund të rrijë pa Të.
Por ajo që e çuditë më shumë, është se i panjohuri mundohet ta fshehë fytyrën. “Jezusi
u afrua – lexon një nga murgjërit - e u tha atyre: ‘Më është dhënë çdo pushtet në
qiell e në tokë. Shkoni, prandaj, e bëni nxënës të mi të gjithë popujt, duke pagëzuar
në emër të Atit e të Birit e të Shpirtit Shenjt e duke u mësuar atyre t’u binden urdhërimeve
të mia. Ja, unë jam me ju për gjithë ditë, deri në fund të botës!”. I përqëndruar
tek lutja, Agostini nuk kujtohet fare se Mesha është kryer. Murgjërit e tjerë tashmë
janë kthyer tek librat e tyre, kur një zë e shkëput nga meditimi: “Vëlla Agostin!”.
Agostini çon sytë e sheh njeriun misterioz të gjunjëzuar para tij. E njeh menjëherë
e, i çuditur pa masë, i drejtohet gjithë gëzim me fjalët: “Lartmadhëria Juaj?!”. E
, pas një heshtjeje të shkurtër, vijon me shaka: “Nuk e dija se ishit një nga besimtarët
e famullisë sime!”. Mbreti hesht i gjunjëzuar, në sa murgu e pyet me zë të ulët,
plot shpresë. “Thua duhet të besoj se Zoti jua ka prekur zemrën?”. “Ashtu është
– përgjigjet mbreti Etelbert – jam këtu për t’ju kërkuar të më pagëzoni”. Agostini
miraton në heshtje. I sillen nëpër mend të gjitha ngjarjet që ka jetuar, qysh nga
dita kur shkeli për herë të parë në Britani. Kujton posaçërisht ndihmën e çmuar që
i dha mbreti. Agostini e shokët e tij erdhën në këtë vend një vit më parë e detyra
që i priste ishte tepër e vështirë. Do të ishte bërë edhe më e zorshme, po të mos
u kishte ndihmuar mbreti Etelbert i cili, megjithëse ishte pagan, kishte zgjedhur
për shoqe jete një vashë të krishterë. Falë ndihmës së tij, murgjërit arritën ta ndërtojnë
këtë kishë e kuvendin e tyre, pranë saj. E në saje të bujarisë së mbretit, mund ta
kalojnë kohën duke u lutur e duke e predikuar lirisht, pa asnjë pengesë, Lajmin e
Mirë të Ungjillit. Pagëzimi i mbretit Etelbert do të jetë një etapë e re për misionin
e Agostinit: bashkësia e tij e vogël tashmë është e fortë e, për më tepër, gëzon edhe
përkrahjen e mbretit, prandaj edhe mund t’i kushtohet më shumë ungjillëzimit të popullit.
Agostini është ipeshkvi i parë, i dërguar nga Papa Gregori i Madh. I takon atij detyra
për ta ngritur, hap pas hapi, Kishën e Anglisë.