Папа Бэнэдыкт 16 прыняў на аўдыенцыі Айцоў Езуітаў
21-га лютага ў Ватыкане Сьвяцейшы Айцец прыняў на прыватнай аўдыенцыі членаў
35-е Гэнэральнае Кангрэгацыі Закону Езуітаў, якая працягвае свае працы ў Рыме.
Новы Гэнэрал айцец Адольфо Ніколяс падзякаваў Папе за ліст накіраваны да Кангрэгацыі.
Бэнэдыкт 16 заахвоціў у ім да працягваньня паслугі там, дзе Эвангэльле і Касьцёл сустракаюць
найбольшыя выклікі. Гэта служэньне выконванае часта з падвярганьнем уласнага спакою,
рэпутацыі, бясьпечнасьці- заўважыў айцец Ніколяс. Бэнэдыкт 16 у сваёй прамове заахвоціў
айцоў езуітаў, каб “з вялікаю турботаю працягвалі фармаваньне членаў свайго Закону
ў ведах і цноце, каб не задавольваліся пасрэднасьцю. Папа заахвоціў езуітаў да адважнага
і разумнага працягваньня сваёй місіі. Паклікаў да роздуму над чацьвёртым шлюбам,
які яны складаюць, менавіта паслухмянасьці Наступніку Пятра. Гэты шлюб- сказаў Бэнэдыкт
16- не абазначае толькі гатоўнасьці быць пасланным на місіі ў далёкія краіны, але
таксама абазначае гатоўнасьць любіць і служыць Вікарыю Хрыста, якім ёсьць Рымскі
Папа. Справа ідзе пра эфэктыўную і поўную адданасьць, якая павінна зрабіць езуітаў
вартаснымі супрацоўнікамі Папы ў служэньні Сусьветнаму Касьцёлу. Закон Езуітаў
налічвае на сёньняшні дзень больш за 19-ць тысяч законнікаў, якія працуюць ва ўсіх
кантынэнтах сьвету.