Vizita e kardinalit Bertone në Kubë, dhjetë vjet pas shtegtimit historik të Gjon Palit
II në ishullin karaibik.
(21.2.2008 RV)Kardinali Tarçizio Bertone, sekretar i Shtetit të Vatikanit,
filloi mbrëmë shtegtimin e pritur në Kubë, me rastin e dhjetëvjetorit të vizitës apostolike
të Gjon Palit II në ishullin karaibik. Për ta pritur zyrtarisht në aeroportin ndërkombëtar
‘Hosè Martì” të Havanës, kishte dalë Felipe Pérez Rok, ministër i jashtëm; në vitet
e kaluara, sekretar personal i Fidel Kastros. Ishin të pranishëm edhe zonja Karidad
Diego, kryetare e Zyrës së Partisë komuniste kubane për Çështjet fetare, kryipeshkvi
i Havanës, imzot Hajme Ortega dhe autoritete të tjera politike e fetare. Gazeta
zyrtare ‘Granma’ botoi dje në faqen parë, një notë të shkurtër, për t’i uruar mirëseardhjen
kardinalit Bertone, si edhe biografinë e Hirësisë së Tij, duke shënuar se vizita e
sekretarit të Shtetit të Vatikanit ka karakter zyrtar e baritor dhe realizohet në
kuadrin e dhjetëvjetorit të vizitës së Gjon Palit II në Kubë. E sot, me vizitën
në Seminarin e Shën Karlit e të Shën Ambrozit, e më pas me Meshën Shenjte në Katedralen
e Havanës, filluan veprimtaritë e para të programit të ngarkuar të vizitës, që do
të përfundojë të martën, më 26 shkurt, me kremtimin e Meshës në Penalver dhe takimin
me autoritetet civile.