Dita e pestë të Ushtrimeve shpirtërore krezhmore, në praninë e Papës: në meditimet
e kardinalit Vanhoi ‘Flijimi i Krishtit’.
(14.02.2008 RV)‘Flijimi i Krishtit’
dhe ‘Roli i Shpirtit Shenjt në Misterin e Pashkëve’: këto ishin temat e meditimeve
të propozuara nga kardinali Albert Vanhoi në paraditën e pestë të Ushtrimeve shpirtërore
për Krezhmë në Vatikan, në praninë e Papës e të Kuries Romake. Ndërsa në meditimin
e pasdites së djeshme, Hirësia e Tij u ndal tek tema: ‘Krishti, ndërmjetësues i Besëlidhjes
së Re në Darkën e Mbrame”. Kujtojmë se Ushtrimet, që filluan të dielën e kaluar,
do të përfundojnë të shtunën.
“Flijimi i Krishtit’ u meditua përmes Letrës
drejtuar Hebrenjve. Në se në gjuhën e sotme fjala ‘flijim’ – ka marrë një kuptim më
shumë negativ- shpjegoi kardinali Vanhoi - në kuptimin fetar tingëllon jashtëzakonisht
pozitive. “Të flijosh, në të vërtetë, nuk do të thotë të privosh, por do të
thotë të bësh të shenjtë, të shenjtërosh. Prandaj mund të themi se flijimi është një
akt tepër pozitiv e frytdhënës, që i jep vlerë të pamasë një oferte”. Flijimi
i Krishtit përmbledh gjithë Misterin e Pashkëve, dmth vdekjen e lumnimin: “Pa
lumnimin do të ishte i paplotë, nuk do ta kishte themeluar Besëlidhjen e Re, sepse
Krishti nuk do të kishte arritur tek Hyji e nuk do të kishte krijuar lidhjen ndërmjet
mjerimit tonë e shenjtërisë së Hyjit”. Më pas predikatari kujtoi se në Besëlidhjen
e Vjetër flijohej për të ndryshuar vullnetin e Hyjit, për të kërkuar ndihmën e tij,
si shkëmbim për dhuratat e ofruara. Ndryshe ndodh në flijimin e krishterë, siç na
e shpjegon Letra drejtuar Hebrenjve: “Autori, përkundrazi, thotë se qëllimi
i flijimit është të ndryshojë vullnetin e njeriut e jo vullnetin e Zotit. Qëllimi
i flijimit është ta bëjë të përkryer ndërgjegjen e njeriut që flijon, t’i japë një
zemër të pastruar e të nënshtruar para Zotit”. Por duhet theksuar se frymëzimi
fetar nuk mjafton për ta ndryshuar ndërgjegjën e mëkatarit: “Duhet një ndërmjetësim
i frytshëm. Mëkatari duhet ndihmuar nga një ndërmjetësues, që s’ duhet të jetë edhe
ai vetë mëkatar, për të hapur rrugën e lidhjes me Hyjin. E ky është edhe problemi
i Besëlidhjes”.