(13.02.2008 RV)Kryeministri i ri laburist australian, Kevin Rud u kërkoi sot
falje zyrtarisht popullsive indigjene të Australisë, për “vuajtjet dhe poshtërimet”
e shkaktuara nga poltikat e asimilimit të zbatuara në periudhën 1910-1970. Mocioni
i qeverisë u miratua njëzëri në hapjen e punimeve të parlamentit. Nisma u përshendet
edhe nga Konferenca Ipeshkvnore e vendit, e cila që në vitin 1998 pati publikuar një
dokument ku u kërkohej falje aborigjenëve për vuajtjet e pësuara.
Në SHBA-të,
Barak Obama fiton edhe tri herë të tjera në primaret e Potomakut, tri shtetet
që rrethojnë kryeqytetin e Uashingtonit. Ndërkaq, për Hilari Klintonin vazhdon momenti
i krizës, filluar të martën e javës së kaluar. Përsa i përket republikanëve, Xhon
MekKein rrezikoi që të humbasë papritur në Virxhinia kundër pastorit baptist Majk
Hakëbi.
Tension i ri në Lindjen e Mesme. Një eksponent i lartë i lëvizjes
shiite libaneze Hezbollah u vra gjatë natës së kaluar në Damask të Sirisë. Vetë
organizata ka akuzuar Izraelin për atentatin. Tel Avivi, natyrisht, ka mohuar çdo
përgjegjësi.
Një komision i pavarur do të kryejë hetime për zgjedhjet e 27
dhjetorit në Kenia, të cilat konfirmuan në detyrë presidentin Kibaki, duke shkaktuar
protestat e opozitës së kryesuar nga Odinga. Kjo është marrëveshja e arritur me ndërmjetësimin
e ish-Sekretarit të përgjithshëm të OKB-së, Kofi Anan për t’i dhënë fund krizës. Nga
ndeshjet e ashpra që pasuan, deri tani kanë vdekur së paku njëmijë vetë dhe janë detyruar
të braktisin shtëpitë rreth 600 mijë të tjerë.