(13.02.2008 RV)Përvoja ndërkulturore do të jetë në qendër të vitit 2008 në
të gjithë Evropën. U paraqit dje në Romë, Viti evropian ndërkulturor, në praninë e
personaliteteve evropiane dhe italiane, si edhe të artistëve nga vende të ndryshme.
Debate dhe ekspozita në të gjithë Bashkimin Evropian do të jenë rast për të reflektuar
mbi rëndësinë e dialogut. Ideja është të kapërcehet koncepti i multikulturalizmit,
që shoqëroi emigracionin drejt vendeve evropiane. Bashkimi i thjeshtë i shumë kulturave
nuk mjafton. Duhet një takim ndërmjet kulturave, ku njëra të mësojë nga tjetra, duke
ruajtur atë pjesë të identitetit që dëshiron, në dialogun me tjetrën. Të ftuar në
Auditoriumin Parku i Muzikës në Romë ishin Ornela Vorpsi, shkrimtare shqiptare me
banim në Paris, intelektuali boshnjak Predrag Matvejeviç, shkrimtari irakian Junis
Toufik, drejtori i Festivalit Dimëror të Sarajevës, Ibrahim Spahiç e shumë të tjerë,
që vijnë nga kultura të ndryshme e flasin gjuhë të ndryshme, por që i bashkon gjuha
e artit, një lloj esperantoje e të gjitha kohërave.