(06.02.2008 RV)Benedikti XVI priti sot paradite presidentin e Sllovenisë, Danilo
Turk, i cili më pas u takua edhe me sekretarin e Shtetit të Vatikanit, kardinalin
Tarçizio Bertone si dhe me sekretarin për marrëdhëniet me shtetet, imzot Dominik Mambertì.
Bisedimet – njofton Salla vatikanase e Shtypit - krijuan mundësitë për të prekur disa
tema të aktualitetit ndërkombëtar, posaçërisht atë të situatës në Ballkan, parë edhe
në dritën e presidencës sllovene të Bashkimit Evropian (janar-qershor 2008). Në planin
e problemeve dypalëshe, u kujtuan marrëdhëniet e mira të Sllovenisë me Selinë e Shenjtë
si dhe çështjet, ende të pazgjidhura, ndërmjet Shtetit e Kishës, duke shprehur vullnetin
e mirë për t’i zgjidhur shpejt e në mënyrë të kënaqshme për të dyja palët.