(06.02.2008 RV)Në se njeriu nuk
përvuhet, nuk mund ta marrë shpërblimin për veprën e vet. Shpërblimi nuk jepet për
veprën, por për përvujtërinë. Shpërblimi nuk jepet për virtytin, as për mundimin që
të shkakton, sepse shumë mundim duhet për të jetuar si njeri i virtytshëm, por për
përvujtërinë, që lind nga të dyja” (Isak Siriaku). Impenjimet krezhmore nuk mund të
jetohen, në se presim prej tyre shpërblim. Krezhmët janë shtegtim pendese e agjërimi,
që na pakëson një pjesë të vetvetes, duke na shtuar në shpirt nevojën për Zotin. Na
prin në shkretëtirën krezhmore pendesa e Shën Gjon Pagëzuesit, i cili duhet të zvogëlohej,
që Krishti të rritej. Farizeu i shembëlltyrës së Lukës është fizikisht i uritur nga
agjërimi, por shpirtërisht i nginjur me vetveten, me të cilën mburret (Lk. 18,
9-14). Publikani që përvuhet e pranon se është mëkatar, fiton faljen e shëlbimin:
mund të nginjet me Hyjin. Agjërojmë, për të kuptuar se njeriu nuk jeton vetëm me
bukë, por me çdo fjalë që del nga goja e Hyjit. Agjërojmë jo vetëm duke u kufizuar
në të ngrënë, por edhe në të gjitha sendet që ushqejnë mburrjen tonë, për të fituar
kështu përvujtërinë që na pastron dëshirën e na bën të kuptojmë se uria e vërtetë
e jetës sonë është uri për Hyjin.Uria për të qenë bijtë e tij. E është bir i Hyjit
ai, i cili nuk mendon se mund ta sigurojë vetë bukën e përditshme që i duhet për
të jetuar, por di ta presë nga duart e Atit, ashtu si Jezusi zemërbutë e i përvujtë,
që pastaj të mund të thotë: “Ati më dorëzoi gjithçka” (Mt. 11,27). Agjërimi
na prin drejt jetës, duke bërë që ne të vdesim për vetveten, për të fituar jetën e
re, që na dhurohet nga Pashkët e Jezusit