Benedikti XVI modifikon Lutjen për Hebrenjtë në liturgjinë e së Premtes së Madhe,
sipas Mesharit Romak.
(05.02.2008 RV)U botua sot në ‘L’Osservatore Romano’ një notë që njofton udhëzimin
e Papës për të zëvendësuar tekstin e Lutjes për Hebrenjtë në liturgjinë e së Premtes
së Madhe, sipas Mesharit Romak, botuar në vitin 1962 nga i Lumi Gjoni XXIII.
Zëvendësimi synon t’u përgjigjet vërejtjeve që u bënë pas botimit të Motu Proprio
Summorum Pontificum të 7 korrikut 2007, dokument papnor që krijon mundësitë
për të përdorur variantin e fundit të Mesharit Romak, botuar para Koncilit
II të Vatikanit. Teksti i ri i Lutjes për Hebrenjtë, sipas përkthimit jo zyrtar
është: “Të lutemi për Hebrenjtë. Zoti, Hyji ynë, ua ndriçoftë zemrat, që ta njohin
Jezu Krishtin, Shëlbuesin e të gjithë njerëzve. O Hyj i Gjithëpushtetshëm e i amshuar,
Ti dëshiron që të gjithë njerëzit të shpëtojnë e ta njohin të vërtetën; jepu, prandaj,
hirin që, duke hyrë tërë popujt në Kishën tënde, mbarë Izraeli të shëlbohet”.Duhet
nënvizuar se mundësia që Meshari Romak i 1962-it të përdoret gjatë Triditshes së Shenjtë,
është e jashtzakonshme dhe ka të bëjë vetëm me grupe të veçanta.