Papa u kujton besimtarëve mundësinë për të fituar ndjesën e plotë me rastin e 150-vjetorit
të dukjeve të Zojës në Lurdë.
(04.02.2008 RV)Dje, në lutjen e Engjëllit të Tënzot, Papa kujtoi se Kisha po
kremton 150-vjetorin e dukjeve të Zojës në Lurdë, kremtim me të cilin lidhet edhe
fitimi i ndjesës së plotë. Ndjesa mund të fitohet duke vizituar Lurdën deri më
8 dhjetorin e ardhshëm. Ndërsa gjatë këtij muaji mund të fitohet në mbarë botën. Në
Mesazhin e tij për Ditën botërore të të sëmurit, që do të kremtohet më 11 shkurtin
e ardhshëm, ditë e dukjes së Virgjërës Mari në Shpellën e Masabielës, Benedikti XVI
thekson pikërisht lidhjen shpirtërore ndërmjet flijimit të Krishtit dhe Nënës së tij,
sepse Misteri eukaristik dhe roli i Marisë në planin shëlbues kanë lidhje të ngushtë
me realitetin e dhimbjes e të vuajtjes së njeriut. E kjo, pa harruar se Maria nuk
mund të kundrohet, në se nuk na tërheq fort Krishti. Kujtojmë edhe se të premten
e ardhshme, më 8 shkurt, në Romë do të arrijnë reliket e Shën Bernardetës Subiru.
Do të vendosen në famullinë kushtuar vegimtares së Lurdës, ku do të kremtohet edhe
Mesha për të sëmurët.