Papa në Engjëllin e Tënzot: vlera e jetës dhe thirrja për Kenian, Irakun e Kolumbinë.
(04.02.2008 RV)Dje, në lutjen e
Engjëllit të Tënzot, pasi foli për vlerën e jetës, rëndësinë e rregulltarëve dhe lutjen
gjatë kohës së Krezhëmve, Benedikti XVI bëri thirrje për Kenian, Irakun e Kolumbinë.
Papa kujtoi se dje, në Itali, kremtohej Dita për Jetën. “Qytetërimi i një populli
matet me aftësinë e tij për t’i shërbyer jetës” – theksoi Ati i Shenjtë, duke kujtuar
fjalët e Konferencës Ipeshkvnore Italiane në mbrojtje të jetës, dhe shtoi: “Secili,
sipas mundësive, profesionit dhe kompetencave, duhet ta ndjejë gjithnjë shtytjen për
ta dashur jetën e për t’i shërbyer, nga zanafilla, deri në perëndimin e saj të natyrshëm”. Të
gjithë duhet të impenjohen – pohoi Benedikti XVI - ta pranojnë jetën njerëzore si
dhuratë që duhet respektuar, duhet mbrojtur e duhet promovuar, aq më tepër kur është
e brishtë e ka nevojë të posaçme për vëmendje e kujdes, si para lindjes, ashtu edhe
në perëndimin e saj. Papa bashkoi, kështu, zërin, me ipeshkvijtë italianë duke u dhënë
zemër të gjithë atyre që pa bujë, me mundim e përkushtim të madh, gjejnë gëzimin
e jetës duke u shërbyer familjarëve pleq ose të sëmurë si dhe atyre që i kushtojnë
rregullisht një pjesë të jetës njerëzve të çdo moshe, që vuajnë nga forma të ndryshme
të varfërisë. Papa foli edhe për një Ditë tjetër, atë të Jetës së përkushtuar,
që u kremtua dje në festën liturgjike të Paraqitjes së Zotit në tempull. Me këtë rast
Ati i Shenjtë u shprehu mirënjohjen të gjithë atyre që ia kushtojnë plotësisht jetën
Zotit e Kishës me kushtet e varfërisë, të pastërtisë e të bindjes dhe nënvizoi se
jeta rregulltare është një pasuri e pallogaritshme për Kishën e për botën. Pastaj
Benedikti XVI kujtoi se të mërkurën e ardhshme, me ritin e përhimjes, fillon Koha
e Krezhëmve. Si çdo vit, Ati i Shenjtë do të kryesojë Eukaristinë me ritin e përhimjes,
në Bazilikën romake të Shën Sabinës, në Aventin. E pasi uroi që Krezhëmt të jenë
kohë kthese të vërtetë për të gjithë të krishterët, Benedikti XVI njoftoi se duke
filluar që sot e deri më 11 shkurt, kur kremtohet festa e Zojës Lurdë dhe 150-vjetori
i dukjeve të saj në Shpellën e Masabielës, besimtarët mund të fitojnë ndjesën e plotë
për vete e për shpirtrat e të vdekurve, pasi të plotësojnë kushtet e zakonshme: të
rrëfehen, të kungohen dhe të luten sipas ndjeteve të Papës, duke u gjunjëzuar para
figurës së Zojës Lurdë, ekspozuar për nderim publik. Ndjesën mund ta fitojnë edhe
pleqtë e të sëmurët, duke plotësuar simbolikisht kushtet që kujtuam më sipër. Pas
lutjes mariane, një mendim për pajtimin, drejtësinë e paqen në Kenia: “Uroj
që përpjekjet për të ndërmjetësuar, në vijim e sipër, falë vullnetit të mirë dhe bashkëpunimit
të të gjithëve, të përfundojnë me sukses e t’i jepet sa më shpejt fund konfliktit,
që ka shkaktuar aq shumë viktima”. Papa reflektoi e u lut edhe për Irakun: “Ligësia,
shkaktare e dhimbjeve të thella, duket se nuk njeh kufi në Irak, prej nga vijojnë
të vijnë lajme jashtëzakonisht të trishtuara. Ngre përsëri zërin për t’i mbështeur
këto popullsi të vëna në provë të rëndë dhe i lutem Zotit t’u dhurojë paqen”.Gjatë
përshëndetjeve në gjuhë të ndryshme, Papa kujtoi Kolumbinë, duke vënë theksin mbi
rrëmbimet e njerëzve, që e trondisin situatën në vend; familjet, vatra të bashkëjetës
civile e shkolla të vlerave njerëzore dhe festën e vitit të ri, që kremtohet në vende
të ndryshme aziatike, shoqëruar me urimin që t’i vlerësojnë e t’i ruajnë këto tradita
të bukura të jetës familjare. Ati i Shenjtë përshëndeti, në përfundim, Bijat e dashurisë
së krishterë në festë, sepse pikërisht dje, në Kaljari, u shpall e lume simotra e
tyre Gjyzepina Nikoli.