(30.01.2008 RV)Gjithnjë
e më kritike gjendja në Kenia, pas dhunës që shpërtheu me rizgjedhjen e presidentit
Kibaki në dhjetor. Sipas burimeve nga Nairobi, policia ka urdhër të qëllojë për të
ndaluar ndeshjet me opozitën. Në planin humanitar, emergjenca është gjithnjë e më
e dukshme. Sipas Unicefit, 100 mijë fëmijë janë larguar nga shtëpitë e tyre, vetëm
ose me familjen. Vazhdon ndërkaq, ndërmjetësimi i ish-sekretarit të përgjithshëm të
OKB-së, Kofi Anan për zgjidhjen e krizës. Të dëgjojmë dëshminë e atë Xhuzepe Karamacës,
misionar kombonian, prej 16 vjetësh në Kenia: Ndeshjet politike kanë shkaktuar
dhunë tjetër, që etiketohet si etnike, por që ndoshta duhet ta quajmë “dhunë sipas
interesit personal”. Disa grupe duan të përzenë etninë Kikujo dhe etni të tjera nga
Rift Valei, për t’u marrë atyre tokën. Këto grupe duan të zbatojnë një rregull që
donte ta impononte opozita, të ashtuquajturën “maxhimbo”, apo rajonalizimin e Kenias.
Ata nuk e kanë kuptuar këtë si vendosjen e autonomive lokale, por si një parim, sipas
të cilit etnia lokale ka të drejtë të përdorë të gjitha pasuritë e vendit dhe të largojë
me forcë etnitë e tjera. Cili është qëndrimi i Kishës Katolike? Natyrisht,
Kisha Katolike e ka refuzuar gjithmonë një gjë të tillë, ka punuar shumë, nëpërmjet
komiteteve të drejtësisë e të paqes për të pajtuar etnitë e Rift Valeit. Por tani,
gjendja na ka ikur nga dora. Nëse më parë qëllimi ishte dialogu, tani duhet risjellë
fillimisht paqja, pastaj duhet punuar për dialogun.