Emigrantët shqiptarë kontribuojnë në marrëdhëniet Shqipëri-Itali

(30.01.2008 RV)U mbajt dje në Tiranë, Konferenca Kombëtare për emigracionin organizuar nga Ministria e Punës, Bashkëpunimi italian për zhvillimin, Organizata Botërore për Emigracionin dhe nga Karitasi Italian. Në takim, ku morën pjesë rreth 150 organizata e shoqata, u vu në dukje kontributi gjithnjë në rritje i emigracionit shqiptar në marrëdhëniet Shqipëri-Itali. Nga Dosja e fundit për emigracionin e Karitasit Italian dhe e Fondacionit Migrantes del se numri i shqiptarëve me banim në Itali ka arritur në 381 mijë vetë, që përbëjnë grupin e tretë etnik pas rumenëve dhe marokenëve. Që nga viti 1991, në shkollat dhe universitetet italiane janë regjistruar 77.900 shqiptarë dhe 15.300 aktivitete private administrohen nga biznesmenë shqiptarë.