365 ditë me njerëz e ngjarje që ia ndryshuan faqen botës.
(29.01.2008 RV) 29 janar: Martini
legjionar, vetmitar, ipeshkëv. Duke ecur nëpër rrugët e shkreta të Amiensit,
qytet në veri të Galisë, Martini takon një lypës që endet duke u dridhur nga e ftohta.
E sheh ashtu të zhveshur, i dhemb zemra e nuk mundet as të hapë gojën për t’i thënë
një fjalë ngushëlluese. E si mund ta ngushëllosh një njeri që dridhet i tëri? Në heshtje
heq mantelin e ngrohtë prej leshi, që e mbulon fund e krye, e ndan më dysh me shpatë
e, si ulet nga kali, e mbështjell me dashuri të panjohurin gjysëm të ngrirë. Kthehet,
pastaj, në kazermë, e bie në gjumë të thellë. Sheh në ëndërr Jezu Krishtin, me pamjen
e lypësit të ngrirë. E Krishti i thotë: “Ti Martin, që je ende katekumen, më mbulove
me mantelin tënd!”. Jemi në vitin 334 e Martini është vetëm 20 vjeç. Ka hyrë në
radhët e ushtrisë romake si legjionar. Vjen nga Panonia, Hungaria e sotme, e përgatitet
të marrë Pagëzimin. E në sa përgatitet për Sakramentin e parë të krishterë, vijon
të kujtojë ëndrrën që pa, pas takimit me lypësin. Me atë ëndërr Jezusi i tregoi Martinit,
para se të pagëzohej, ç’duhet të bëjë i krishteri. Martini e ka plotësisht të qartë:
t’i duash të varfërit, është njëlloj si të duash vetë Jezusin! Vendos menjëherë
të marrë Pagëzimin e pastaj, si të kryejë shërbimin ushtarak, pas njëzet vjetësh,
t’ia dhurojë gjithë jetën Jezusit. E kështu edhe ndodh. Në moshën dyzetvjeçare
Martini nis të jetojë si vetmitar, duke u lutur e duke agjëruar. Zë vend në Ligyzhè,
pranë Puatjesë. Por banorët e Turs, qytet që ndodhet njëqind kilometra larg eremitazhit,
shprehin dëshirën të bëhet ipeshkvi i tyre. Martini ngurron. I pëlqen shumë më tepër
të vijojë jetën vetmitare. Po ata ia mbushin mendjen e vetmitari bëhet ipeshkëv.
Edhe pasi bëhet ipeshkëv i Turs, Martinin vijon ta tërheqë jeta vetmitare. Vendoset
në një kasolle të ndërtuar me degë pemësh, larg qytetit e aty, së bashku me dishepujt
që nisin ta ndjekin, themelon kuvendin e Marmytier. Krishtërimi është përhapur
tashmë në të gjitha qytetet e Galisë. Martini dëshiron të ungjillëzojë fshatrat, duke
e përhapur në të katër anët e vendit Lajmin e Mirë të Krishtit. Nuk ngurron t’i kundërvihet
me të gjitha forcat paganizmit: rrënon tempujt e shtatoret, dënon kultet kushtuar
hyjnive keltike e romake. Ashpërsia e tij shpesh herë i çudit njerëzit që e rrethojnë,
të cilët nuk pushojnë s’e pyeturi: “Ti predikon një Zot që është dashuri e pastaj
vjen e rrënon tempujt tonë?”. “Zotat tuaj prej guri e prej druri janë të pagojë
e nuk interesohen për njerëzit. Hyji i Jezusit ju jep mundësi të ndryshoni jetën,
t’i shikoni ata që ju rrethojnë e t’i doni. Nuk duhet humbur kohë” – përgjigjet ipeshkvi
shenjt.Martini përshkon mbarë Galinë e në shumë vende mbeten ende të pashlyera gjurmët
e tij. Prandaj shumë vise të Francës quhen ‘Shën Martin’ e shumë njerëz, Martin!