Tension i lartë në Bejrut pas ndeshjeve të djeshme
(28.01.2008 RV)Bejruti u zgjua sot në një qetësi të ngarkuar me tension, pas
ndeshjeve të djeshme ndërmjet opozitës shiite dhe ushtrisë, në të cilat mbetën të
vrarë tetë vetë. Ndeshjet u zhvilluan në të njëjtën kohë me mbledhjen e Lidhjes Arabe
në Kajro, e cila diskutonte pikërisht për çështjen e Libanit. Sot paradite, punimet
përfunduan me një tjetër thirrje që mazhoranca dhe opozita të merren vesh për zgjedhjen
e presidentit. Senaca e ardhshme parlamentare libaneze është caktuar më 11 shkurt.
Për rolin e Lidhjes Arabe na flet jezuiti Samir Khalil Samir: Lidhja Arabe po
përpiqet të gjejë një zgjidhje. Për botën arabe, Libani është thelbësor. Është modeli
i një shoqërie jo të përkryer, por që përpiqet të gjejë një zgjidhje të pranueshme
për një vend me shumë kultura, zgjidhje që mund t’u shërbejë edhe vendeve të tjera.
Kriza vjen nga një kontrast tepër i fortë. Nga njëra anë popullsia thotë: “Mjaft me
këtë qeveri tepër të lidhur me Perëndimin e me paratë. Duam të ndryshojmë gjërat”.
Nga ana tjetër, qeveria e konsideron veten të ligjshme, si në të gjitha vendet ku
ekziston një mazhorancë dhe një opozitë. Lidhja Arabe po përpiqet t’i afrojë pikpamjet
dhe të gjejë një zgjidhje. Në këtë situatë, edhe të krishterët ofrojnë një shembull
për t’u ndjekur. Nga njëra anë, gjenden si në qeveri, ashtu edhe në opozitë, gati
njëlloj. Nga ana tjetër, ofrojnë shërbime, si në shkolla, në fushën shoqërore, jo
vetëm për bashkësinë e krishterë. Spitalet e krishtera janë si për të krishterët,
ashtu edhe për myslimanët.