BE-Serbi: Hollanda bllokon marrëveshjen e Asociim-Stabilizimit
(28.01.2008 RV)Nënshkrimi i marrëveshjes së Asociim-Stabilizimit ndërmjet Bashkimit
Evropian dhe Serbisë shtyhet. Krerët evropianë të diplomacisë, të mbledhur në Bruksel
për Komisionin e Punëve të Jashtme, nuk vendosën sot asgjë të re, në pritje të ballotazhit
të 3 shkurtit ndërmjet kandidatit europeist për president, Boris Tadiç dhe ultranacionalistit
Tomisllav Nikoliç. Gjithsesi, siç deklaroi ministri i jashtëm gjerman, Frank-Valter
Shtajnmajer, Brukseli vazhdon ta mbështesë integrimin e Serbisë në Bashkimin Evropian.
Vendimtar, qëndrimi i Hollandës, e cila është gati të përdorë veton, nëse në momentin
e nënshkrimin të Marrëveshjes, Beogradi nuk ka dhënë prova për bashkëpunimin me Gjykatën
e Hagës. Por gjithnjë Shtajnmajer theksoi se kjo është një kërkesë e të 27-të shteteve
dhe se “evropianët duhet të jenë të bashkuar dhe duhet të kenë kujdes në deklaratat
e tyre publike”.
Për Sekretarin e Përgjithshëm të OKB-së, Ban Ki-Mun “e
ardhmja e Kosovës është mbi të gjitha problem evropian, por kjo nuk përjashton
interesin e OKB-së për zhvillimet në zonë”. Pas takimit me presidentin e Sllovakisë,
Ivan Gasparoviç në Bratislavë, Ban Ki-Mun sqaroi se OKB-ja do të impenjohet për të
shmangur humbjen e jetëve njerëzore. Së shpejti, Sekretari i Përgjithshëm i Kombeve
të Bashkuara do të diskutojë për Kosovën me përfaqësues të Bashkimit Evropian dhe
të vendeve ballkanike, në mënyrë që OKB-ja të ndërmarrë “disa hapa të veta” në zonë.
Ban Ki-Mun nuk dha detaje për hapat në fjalë.