(26.01.2008 RV)Përfundoi dita e dytë e vizitës së presidentit të Shqipërisë,
Bamir Topi në Kosovë. Sot ai u takua me dyer të mbyllura me kryeministrin e Kosovës,
Hashim Thaçi. Më pas në konferencën për shtyp, të dy deklaruan se shpallja e pavarësisë
së Kosovës është tashmë çështje orësh. Aktivitete të tjera të presidentit Topi
kanë qenë edhe vizitat në Prekaz, Skënderaj e Pejë, ku janë bërë homazhe për të nderuar
dëshmorët e vjetër e të rinj të Kosovës. Gjithashtu, Topi mori titullin “Qytetar nderi
i Prishtinës” dhe përuroi Qendrën për Informim dhe Biznes të Shqipërisë në Kosovë.
Nesër, presidenti i Shqipërisë do të shkojë në Prizren, ku do të vizitojë Shtëpinë
Muze të Lidhjes së Prizrenit.