U paraqit takimi për kremtimin e 25-vjetorit të shpalljes së Kodit të së Drejtës Kanonike, që do të mbahet në Vatikan.

(22.01.2008 RV) Sot paradite, në Sallën e Shtypit të Vatikanit, u mbajt konferenca për paraqitjen e takimit “Ligji kanonik në jetën e Kishës. Kërkim e perspektiva, nën dritën e mësimeve papnore”, që do të mbahet më 24 e 25 janar në Sallën e Sinodit në Vatikan. Takimi organizohet me rastin e 25-vjetorit të shpalljes së Kodit të së Drejtës Kanonike. Gjatë paraqitjes folën imzot Françesko Kokopalmiero dhe imzot Huan Injacio Arrieta, përkatësisht kryetar e sekretar i Këshillit Papnor për Tekstet Ligjore.
“Të rishikohet pjesa kryesore e rendit ligjor të Kishës, duke pasur parasysh arritjet doktrinore të Koncilit II të Vatikanit”. Me këtë objektiv, më 29 janar 1983, Gjon Pali II shpallte Kodin e së Drejtës Kanonike. Ky tekst - nënvizoi imzot Françesko Kokopalmiero - është fryt i një pune shumëvjeçare për rishikimin e Kodit të vitit 1917. Kryetari i dikasterit të Vatikanit pohoi se Kodi i së Drejtës Kanonike është, mbi të gjitha, një tregues i të drejtave dhe i detyrave të rrënjosura në personin e besimtarëve ose në strukturat e Kishës me vendimin e vetë Krishtit. Më pas u ndalua në karakteristikat e tekstit të shpallur 25 vjet më parë:
“Është një kanun programatik, nga i cili vijnë, më pas, shumë përcaktime konkrete, që kanë të bëjnë me besimtarët e, posaçërisht, me besimtarët laikë: të gjithë janë të thirrur të jenë aktivë në Kishë, të marrin pjesë në kremtimet liturgjike, në mësimdhënie, në drejtim, secili në detyrën e vet, por të gjithë në mënyrë aktive”.
Kujtoi, kështu, rëndësinë e Këshillit Papnor për Tekstet ligjore, i cili ka për detyrë jo vetëm të interpretojë ligjet, por edhe të ndihmojë Papën në zbatimin e drejtë të ligjeve në fuqi si dhe në kujdesin për ta pasur gjithnjë ligjishmërinë të plotë e të azhurnuar.
Duke iu përgjigjur pyetjeve të gazetarëve, imzot Kokopalmiero nënvizoi se progresi ekumenik, posaçërisht me ortodoksët, do të kërkojë sigurisht ballafaqimin e traditave të ndryshme kanonike. Më pas ripohoi qëndrimin e Kishës lidhur me abortin:
“Mendoj se Kisha do të zbatojë në mënyrë të vendosur Doktrinën e saj lidhur me këtë krim, e prej këndej, besoj se nuk mund të hamendësohen ndryshime të asnjë lloj tipi”.
Në përfundim prelati theksoi rëndësinë e përgatitjes së meshtarëve për njohjen e së drejtës kanonike ndër seminare e institute, ku vijojnë studimet.
Kujtojmë se specializimi i meshtarëve në të drejtën kanonike në Kishën shqiptare ka një traditë të mirënjohur, që po vijon me sukses edhe sot, me përgatitjen e disa meshtarëve të rinj si specialistë të kësaj disipline kaq të rëndësishme për jetën e fetare të të gjithë besimtarëve.
Përmendim vetëm emrat e dy meshtarëve të rinj shqiptarë që përgatiten në Romë në këtë disiplinë. Janë prifti dom Gjergj Meta, që studion në Universitetin Gregorian dhe rregulltari françeskan, Atë Aurel Gjerkaj, në Universitetin Antonian.