Papa: shkolla katolike është e hapur për të gjithë dhe respekton identitetin e secilit.
(21.01.2008 RV)“Përballë sfidave të reja të globalizimit e të pluralizmit në
rritje, shkolla katolike duhet të pyesë veten cili është misioni i saj”: këtë u kujtoi
Benedikti XVI anëtarëve të Asamblesë plenare të Kongregatës për Edukimin katolik,
të cilët i priti sot në Sallën Klementine në Vatikan. Papa nënvizoi se shkollimi është
shprehje e dashurisë së Krishtit; është edhe e para shprehje e mëshirës shpirtërore,
për të cilën është e thirrur Kisha. Me që sektori i edukimit është posaçërisht i dashur
për Kishën - vijoi Ati i Shenjtë - është e nevojshme të reflektohet si mund ta bëjmë
real e frytdhënës misionin apostolik të bashkësisë kishtare, që u është besuar universiteteve
katolike, në një kohë kur ndjehet fuqimisht kriza edukative e kur shkolla duhet ta
ketë mirë parasysh sfidën e re të një mjedisi ndërkulturor e ndërfetar.Përballë një
situate të tillë, Papa vuri theksin mbi rëndësinë e formimit të përgjithshëm të meshtarëve,
që duhet t’i bëjë të aftë për të dialoguar me kulturat bashkëkohore në të gjitha fushat.
Ati i Shenjtë theksoi se edhe bashkësitë e krishtera, posaçërisht famullitë, duhet
të kenë një formim të përshtatshëm shpirtëror, që të jenë sa më të vetëdijshme në
veprimtarinë ungjillëzuese, posaçërisht kur është fjala për edukimin katolik të të
rinjve.