Papa në Mesazhin për Ditën botërore të të sëmurit 2008: në Eukaristi gjindet kuptimi
shëlbues i dhimbjes; në Virgjërën Mari, Nëna që ngushëllon.
(19.01.2008 RV)“Duhen vlerësuar plotësisht”, ndërmjet tjerash, ngjarjet e
mëdha kishtare të qershorit 2008-të: kremtimi i 150-vjetorit të dukjeve të Zojës së
Bekuar në Lurdë dhe Kongresi eukaristik i Kebekut. Këtë kërkon Benedikti XVI në Mesazhin
e tij për Ditën botërore të të sëmurit, që do të kremtohet më 11 shkurtin e ardhshëm,
ditë e dukjes së Virgjërës Mari në Shpellën e Masabielës, ku Bernardeta Subiru pa
mes shkëmbinjve, ‘Zonjën e Bardhë’. E pikërisht ky vend, që do të bëhej cak lutjesh
e simbol shprese për miliona të sëmurë, do të jetë deri më 8 dhjetor të këtij viti,
qendër e Jubileut, 150-vjetorit të dukjeve të Zojës së Papërlyer. Benedikti XVI
e përqëndron Mesazhin pikërisht tek lidhja shpirtërore ndërmjet flijimit të Krishtit
dhe Nënës së tij. E për Papën, Misteri eukaristik dhe roli i Marisë në planin
shëlbues kanë një lidhje të ngushtë me realitetin e dhimbjes e të vuajtjes së njeriut.Nga
njëra anë, Eukaristia e cila, në kundrimin e flijimit të shëlbimit të Krishtit sjell
paqen në zemrën e atij që, edhe pse i sëmurë, e jeton me fe dhimbjen e vet. Nga ana
tjetër, Zoja e Bekuar, të cilën ai që vuan e konsideron si Nënën e ngushëllimit.
Kur mediton për Të – shkruan Papa në Mesazh – i sëmuri merr mësimin e parë: “Të pranojë
vuajtjen, të shqiptojë atë ‘po’ që e pati bashkuar Marinë me misionin e Krishtit,
shpërblyesit të njerëzimit. Mësimi i dytë është të pranojë që Ajo ta marrë për dore,
që të shtojë ‘u bëftë si do Hyji’, për gjithë jetën, e cila është e ngarkuar me
gëzime e trishtime, me shpresa e zhgënjime, duke qenë i vetëdijshëm se provat, dhimbja
e vuajtja e pasurojnë shtegtimin tonë mbi tokë”. E kjo, pa harruar se Maria nuk mund
të kundrohet, në se nuk na tërheq fort Krishti!”.