(18.01.2008 RV)Rritet impenjimi evropian për të përfshirë edhe Ballkanin në
rrjetin energjitik të kontinentit. Sot në Bullgari, presidenti Putin nënshkroi një
marrëveshje për realizimin e gazsjellësit “South Stream” (Rryma e jugut), ku një rol
të rëndësishëm ka luajtur Eneli italian. Po një grup italian, “Moncada Costruzioni”
e Agrixhentos do të ndërtojë një kabllo nënujore private, që do të lidhë Vlorën me
Brindizin. Kablloja do të përdoret për transportimin e energjisë nga impianti i energjisë
eolike që Grupi do të ndërtojë në Shqipëri. Impianti, që shfrytëzon energjinë e erës,
do të ketë një fuqi prej 500 Megavatësh dhe do të jetë më i madhi në Evropë.
Shkallëzim
i ri i dhunës në Lindjen e Mesme. Në Rripin e Gazës vazhdojnë bombardimet izraelite
dhe hedhja e raketave Kasam nga ana e palestinezëve në drejtim të Shtetit hebraik.
Një gjendje që rrezikon të degjenerojë edhe më tej, për shkak të vendimit të Izraelit
për mbylljen e kalimeve. Në zonë jetojnë mëse një milion vetë në kushte të mjerimit
absolut. Masa e marrë alarmoi menjëherë organizatat humanitare, të cilat kanë frikë
se Rripi i Gazës izolohet krejtësisht.