Imzot Sgreçia mbi klonimin e pesë embrioneve njerëzore
(18.01.2008 RV)Dyshime dhe kujdes
në bashkësinë ndërkombëtare për lajmin e publikuar në revistën “Stem Cells” se një
institut kërkimor-shkencor kalifornian ka klonuar, për herë të parë në histori, pesë
embrione njerëzore nga të cilat të merren qeliza staminale, që më pas të përdoren
për kura mjekësore. Për klonimin është përdorur e njëjta metodë si për delen Doli.
Disa studiues kanë dyshime për eksperimentin dhe janë shumë të kujdesshëm pas shkandullit
që shkaktoi një lajm i tillë i rremë, pak vjet më parë në Kore. Në mikrofonin tonë,
opinioni i imzot Elio Sgreçës, president i Akademisë Papnore për Jetën: Mbi
klonimin e këtyre pesë embrioneve njerëzore mund të them dy gjëra. E para është se
është e pamoralshme, pasi bëhet mbi njeriun. Derisa ishte fjala për një dele, ose
për një majmun mund të kishte një motiv shkencor të justifikuar, por mbi qenien njerëzore,
klonimi është përdorimi më i keq që mund të mendohet i njeriut si mjet. Njeriu kthehet
kështu në objekt kërkimor-shkencor. Përsa i përket justifikimit se prej këtyre embrioneve
do të dalin kura, deri tani nuk ka pasur asnjë sukses e gjithsesi, nuk është e drejtë
që njeriu të përdoret si ilaç. E dyta, është një fakt kundër historisë. Pasi u provua
se qelizat staminale të rritura, të riprogramuara, mund të prodhojnë qeliza të të
njëjtit tip si ato embrionale, ky është një produkt i vonshëm. Nuk ekziston pra më
as preteksti për të gjetur diçka që tashmë ndodh nëpërmjet rrugëve më të ligjshme.