365 ditë me njerëz e ngjarje që ia ndryshuan faqen botës
ttp://www.archivioradiovaticana.va/storico/ALB/2008/01/files/audio/ra/00099442.RM#Netia_Fn#14
janar: Një mjek bën hetime mbi Jezusin. Si ta shpjegosh të pashpjegueshmen?
Pasi takon Palin në portin e vogël të Troades, Luka e kupton se në botë ndjehet një
frymë e re. Në emër të atij Jezusit, vdekur mbi kryq, por gjithnjë gjallë, burra e
gra, në të katër anët, bëjnë një kthesë të çuditshme në rrugën e jetës. Qarkullojnë
libra, që tregojnë historinë e Jezusit, shkruar nga Mateu e nga Marku. Por Luka dëshiron
të dijë diçka më shumë. Eshtë mjek, njeri i ditur e nuk mund ta pranojë, pa e vërtetuar,
atë që tregohet. Vendos, prandaj, të shkojë tek ata që e njohën nga afër Jezusin.
Kur arrin në Jeruzalem, gjen atje shumë dëshmitarë, të cilët e kujtojnë pikë për pikë
ngjarjen e çuditshme. Tregojnë pa ngurrim: “Jezusi u arrestua, u gjykua nga priftërinjtë,
u paraqit para Pilatit, u vu në kryq e u varros. Disa gra, ndërmjet të cilave edhe
Maria, e ëma, shkuan te varri në sa shkrepte agimi i Pashkëve... E atje zbuluan diçka
të pabesueshme: Jezusi është gjallë! Dy të krishterë nga Emausi treguan se, ndërsa
ktheheshin prej Jeruzalemit, një njeri u bashkua me ta e e përshkuan gjithë udhën
duke biseduar me të. E si arritën në një bujtinë e u ulën për të ngrënë një kafshatë,
shoku i udhës theu bukën. Sapo e panë këtë gjest, sytë e tyre u hapën e e njohën:
Ishte ai, Krishti! Ishte vërtetë i gjallë, vërtetë në mes tyre”. Në se fundi
i jetës së Jezusit qe kaq i jashtëzakonshëm, si duhet të kishte qenë fillimi? Lindja?
Hapat e para? E kush ishin prindërit e tij? Thua edhe vitet e para të jetës së tij
ishin po kaq të jashtëzakonshme? Luka niset të takojë Marinë, e cila i flet për
të kushërirën, Elizabetën e për Gjon Pagëzuesin, të birin. I tregon se në fillim,
para se të niste rrugën e vet, Jezusi kishte ndjekur Gjon Pagëzuesin. Ndërsa për
praninë e Hyjit, që ndriçonte gjithë personin e të birit, Maria nuk di ç’të thotë.
Po pyetjet e Lukës vijojnë si breshër: “Pse ishte zgjedhur pikërisht ajo? Ç’mund
të thoshte për fëmijërinë e të birit? Jezusi kishte kaluar një fëmijëri të zakonshme? E
lindja e tij?” Lindja sigurisht duhet të kishte qenë e jashtëzakonshme. Jezusi
kishte lindur në një stallë e barinjtë që ruanin grigjët atypari, kishin shkuar për
ta parë së bashku me delet e qengjat e posalindur. Lukës iu kujtua një fragment nga
Libri i Izaisë profet: “Kau e njeh të zotin e gomari grazhdin e zotërisë së vet....
Një fëmijë lindi për ne, na u dhurua një djalë”. Luka mrekullohet nga gjithë kjo
thjeshtësi, nga kjo ngjarje gati-gati e rëndomtë. Ajo që po zbulon, përkon plotësisht
me fjalët që thotë Pali për Zotin: “Për t’u pranuar nga njerëzit, Krijuesi i botës
u bë i përvujtë. U zhduk, deshi të bëhej një nga ne, të jetonte si ne”. Ungjilltari-hetues
vërteton edhe shumë ngjarje e hollësi të tjera. Merr, atëherë, puplën, e nis t’i rreshtojë
të gjitha mbi letër...